Haravugwa icyatumye Tshisekedi yanga kwitaba inama ya EAC iyo bita idasanzwe.
Repubulika ya demokarasi ya Congo, yatangaje ko perezida w’iki gihugu, Félix Tshisekedi atitabira inama idasanzwe y’abakuru b’ibihugu bigize umuryango wa Afrika y’iburasirazuba (EAC), yiga kukibazo cy’umutekano muke uri mu Ntara ya Kivu Yaruguru muri Congo.
Ni nama iri buterane kuri uyu wa kabiri tariki ya 28/01/2025, aho yahamagajwe na perezida wa Kenya, William Ruto unayoboye uyu muryango wa Afrika y’iburasirazuba.
Perezida wa Kenya, yatumije iyi nama nyuma y’aho avuganye kuri telephone na perezida Félix Tshisekedi na Paul Kagame w’u Rwanda ku kibazo cy’u mutekano muke uri mu Burasirazuba bwa Repubulika ya demokarasi ya Congo.
Igitangaje perezida Félix Tshilombo ntari bwitabire iyi nama kandi iri bwige ku bibazo by’u mutekano muke uri mu Burasirazuba bwa RDC, nk’uko ibiro by’umukuru w’iki gihugu byatangaje.
Byagize biti: “Perezida Félix Tshisekedi ntiyitabira inama y’umuryango wa EAC.”
Amakuru yo ku ruhande avuga ko Leta ya Kinshasa inenga iyi nama ngo kuko M23 mu gufata umujyi wa Goma yafashijwe n’ingabo za Kenya na Uganda.
Umujyi wa Goma umutwe wa M23 wa wigaruriye mu gitondo cyo ku wa mbere, nk’uko umuvugizi w’uyu mutwe yabishize mu itangazo.
Binavugwa ko muri uyu mujyi urusaku rw’amasasu y’imbunda yagabunutse kuri uyu wa kabiri mu gihe ku wa mbere ho hiriwe rwinshi.
