Ibya Congo Airways biravuza ubuhuha nyuma yokwimwa uruhushya.
Isosiyete ikora ubwikorezi bwo mu kirere muri Repubulika ya demokarasi ya Congo, Congo Airways, yambuwe uburenganzira bwo gukora ubwikorezi bwo mu kirere, kubera ko yabuze indege.
Aya makuru yatangajwe ku munsi w’ejo hashize tariki ya 15/09/2024, n’urwego rushinzwe Indege za gisivile rwambuye uruhushya iyi Sosiyete kuko itari igifite indege byatuma ibasha gukora ubwikorezi.
Ubushize Leta ya Kinshasa yagaragaje ko ikomerewe no kubyutsa ibikorwa bya ‘Congo Airways,’ cyane ko yari isigaranye indege imwe na yo ikodesha.
Ku wa 19/06/2024 ni bwo inama y’abaminisitiri y’iki gihugu yemeje umwanzuro wo kubyutsa ibikorwa bya Congo Airways.
Muri iyi nama minisitiri, J. Pierre Bemba, yagaragaje ko ingamba z’imyaka itatu zitandukanye zizakoreshwa mu kubyutsa iyi Sosiyete. Zirimo kugura cyangwa gukoresha indege 3 za Airbus A320.
Bemba yakomeje agaragaza ko kuri ubu Congo Airways ifite indege imwe ikodesha kandi amasezerano yo kuyikodesha na yo akaba azarangira tariki ya 16/09/2024.
Iki kibazo cyanemejwe n’umuvugizi wa Leta ya Kinshasa, Patrick Muyaya, wavuze ko nubwo iyi gahunda yo kongera guha uruhushya Congo Airways ihari , amafaranga azakoreshwa ataraboneka.
Ibyo byabaye nyuma y’uko mu 2022, inama y’abaminisitiri b’iki gihugu cya RDC yari yemeje ko ishingwa rya Sosiyete nshya y’indege ‘Air Congo’ isimbura Congo Airways.
Uwari minisitiri w’itumanaho no gutwara abantu n’ibintu muri icyo gihe, Chérubin Okende, yari yavuze ko iyo Sosiyete izashingwa ku bufatanye na Ethiopian Airlines isanzwe ikora ingendo z’indege ariko imigabane myinshi ikazaba ari iya Leta ya Kinshasa. Ariko iyi gahunda na yo yakomeje kudindira.
MCN.