Ibyo kwirukanwa kwa visi perezida wa Kenya, Rigathi Gachagua bigeze ku ntambwe ya nyuma.
Mu gihugu cya Kenya, Sena irimo iraburanisha ikirego cy’umutwe w’Abadepite cyo gukura ku butegetsi visi perezida wa Repubulika ya Kenya, Rigathi Gachagua. Urubanza rugitangira, Gachagua yavuze ko ari umwere ku byaha byose aregwa.
Mu byo abadepite bashinja Gachagua w’imyaka 59 y’amavuko harimo ruswa, kunyereza umutungo w’igihugu, kubiba amacakubiri n’urwango rushingiye ku moko, gukoresha umwanya we mu nyungu ze bwite, kubangamira imikorere ya Guverinoma, no gushyigikira imyigaragambyo yakozwe mu kwezi kwa Gatandatu uyu mwaka. Iyi myigaragabyo ikaba yaraguyemo abantu 50, hangirika n’ibintu byinshi birimo ko yasize hatwitswe n’ingoro y’inteko ishinga mategeko.
Gachagua yabwiye Sena ko nta cyaha na kimwe yemera. Umutwe w’Abadepite ufite intumwa zikora akazi k’ubushinjacyaha. Sena irumva n’abatangabuhamya. We na ba avoka be bafite uburenganzira bwo guhata ibibazo abamushinja. Ni we kandi n’abavoka baza kugira icyo bavuga kuri uyu wa kane kuko Sena iraza gukora amatora kuri buri cyaha.
Kugira ngo Gachagua ahite ava ku butegetsi ako kanya, itegeko nshinga rivuga ko byibuze 2/3 byabagize Sena bagomba kumwemeza ibyaha. Ni ukuvuga byibuze amajwi 45 kuri 68 y’abasenateri. Ariko rero yavuze ko azitura ubucamanza ikibazo cye, Sena niramuka imwirukanye ku mwanya we.
Ariko kandi Gachagua akomeje gusaba abayoboke be kuguma mu mutuzo, nk’uko igitangaza makuru cya Reuters kibivuga.
MCN.