M23 yigaruriye uduce turenga tubiri two muri teritware ya Walikale.
Amakuru aturuka muri teritware ya Walikale avuga ko umutwe wa M23 uhanganye bikomeye n’igisirikare cya Repubulika ya demokarasi ya Congo(FARDC ), wigaruriye Localité zitatu zo muri iyo teritware ya Walikale.
Amakuru yizewe tumaze kumenya kuri Minembwe Capital News, avuga ko mu mirwano iheruka gusakiranya umutwe wa M23 n’ihuriro ry’Ingabo zirwana ku ruhande rwa Leta ya Kinshasa, yemeza ko aba barwanyi binjiye muri teritware ya Walikale kuva ku wa Kabiri w’iki Cyumweru turimo.
Walikale ihana imbibi na teritware ya Masisi, aho ibyo bice bihurira kugera mu mujyi wa Goma hari ibirometero birenga magana atanu.
Minembwe Capital News yabwiwe n’abaturage bo muri ibyo bice ko imirwano yo ku wa Gatatu hagati y’impande zihanganye yatangiye igihe c’isaha z’urukerera rwo kuri uwo munsi, kandi ko yatangiriye i Kalembe ho muri teritware ya Masisi.
Kalembe imaze hafi iminsi ingana n’icyumweru iberamo imirwano. Ishyirahamwe riharanira uburenganzira bw’abaturage baba mu bice biberamo imirwano, Lutte Pour Les conflits arméé ASBL, rikorera muri ako gace ko muri teritware ya Walikale ryemeza naryo iyo mirwano. Iri shyirahamwe, ushinzwe itumanaho muri ryo, yabwiye itangaza makuru ko iyo mirwano yaguyemo abantu batari bake.
Ahanini iyi mirwano yarushijeho gukomera, nyuma y’uko aba barwanyi ba M23 bari bafashe uyu mujyi muto wa Kalembe, ufatwa nk’ukomeye cyane kuri izo teritware zombi zisangiye aka gace gatuwe n’abaturage barenga ibihumbi 47, nk’uko bikomeje kuvugwa.
Kalembe mbere y’uko yigarurirwa na M23 yahoze ari ibirindiro bikomeye bya Wazalendo, FDLR n’ingabo za SADC.
Kugeza ubu imirwano irakomeje hagati ya M23 n’ihuriro ry’Ingabo zirwana ku ruhande rwa Leta ya Kinshasa, aho ndetse amasoko yacu avuga ko aba barwanyi bayobowe na Gen Sultan Makenga bafashe andi malocalite atatu yo muri teritware ya Walikale.
Hagati aho impande zombi zikomeje kwitana bamwana mu kutubahiriza ubusabe bwa ONU. Ingabo za FARDC zishinja M23 gutera ibirindiro byabo, mu gihe M23 nayo ivuga ko u ruhande rwa Leta rufatanije, n’ingabo z’u Burundi, ndetse n’imitwe yitwaje imbunda irimo FDLR na Wazalendo aribo batangiye kubagaboho ibitero.
MCN.