Uwayoboye urugamba rwahiritse ubutegetsi bwa Idi Amini y’itabye Imana, menya uwo ari we.
Ni General David Musuguri yigezeho kuba umugaba w’ingabo za Tanzania, yarangije ku munsi w’ejo hashize tariki ya 29/10/2024, akaba apfuye afite imyaka 104 y’amavuko.
Amakuru ava mu gihugu cya Tanzania, uyu musirikare avukamo, avuga ko uyu mu General yaguye mu bitaro biherereye mu mujyi wa Mwanza aho yari amaze igihe avurirwa.
Uyu musirikare yamaze imyaka 46 akorera igisirikare cya Tanzania, yabayeho umugaba w’ingabo z’iki gihugu imyaka 8, hagati ya 1980 na 1988 ubwo yagisezererwagamo.
Ahagana mu mwaka w’ 1978 yayoboye ingabo za Tanzania zahiritse ubutegetsi bw’umunyagitugu Idi Amini Dada wahoze ari perezida wa Uganda, nyuma yo gushotora Tanzania akohereza ingabo ze mu gace ka Kyaka kari mu karere ka Kagera.
Aya makuru anavuga ko Idi Amini yigezeho kuba umunyeshuri w’uyu musirikare ubwo yari umwalimu utanga imyitozo ya gisirikare mu kigo cya gisirikare cya Kahwa kiri i Nairobi muri Kenya.
Intambara zikomeye uyu Gen Musuguri yarwanye, zirimo iya kabiri y’isi, iyo muri Madagascar, iya Kagera ndetse n’urugamba rwo mu misozi ya Simba.
