Abandi basirikare benshi b’u Burundi baguye mu mirwano muri kivu Yaruguru.
Mu nkengero z’umujyi wa Sake muri teritware ya Masisi mu Ntara ya Kivu Yaruguru, haguye abasirikare benshi barwana ku ruhande rwa Leta ya Kinshasa mu mirwano yabasakirinyije n’umutwe wa M23.
Amakuru ava muri ibyo bice avuga ko muri abo basirikare bapfuye, harimo barindwi b’u Burundi, aba FARDC icumi na babiri, naho Wazalendo umunani.
Ni mu mirwano yabaye ku mugoroba wo ku wa kabiri, itariki ya 18/11/2024; bikaba byaratumye umuhanda wa Sake ufungwa uza gufungurwa mu gitondo cyo kuri uyu wa gatatu.
Iyi mirwano yabaye kandi mu gihe i Mubambiro hafi n’aho barimo barwanira, hari hoherejwe abasirikare benshi bo mu ngabo za Repubulika ya demokarasi ya Congo n’iz’u Burundi mu rwego rwo gufungira abarwanyi ba M23 badafata umujyi wa Goma.
Si FARDC yonyine yarunzwe i Mubambiro kuko hari kandi n’abarwanyi ba bacanshuro ba bazungu, hagamijwe kurinda umujyi wa Goma.
Aya makuru anavuga ko umuhanda wa Sake nubwo wafunguwe, uri gukoreshwa gusa n’abakoresha moto n’abagendesha amaguru, ni mu gihe abasirikare bo ku ruhande rwa Leta badashobora kugera mu bice M23 igenzura.
Ibyo bibaye mu gihe mu Cyumweru gishize, abandi basirikare babarirwa kuri 50 b’u Burundi bari baheruka kugwa mu mirwano yabaye ahitwa Manzia ho muri teritware ya Lubero.
Iyi mirwano yanasize umutwe wa M23 ufashe ako gace n’utundi turi mu nkengero zako.