Imirwano ikaze yongeye kubera muri teritware ya Lubero.
Kuri uyu wa kane tariki ya 05/12/2024, imirwano hagati ya M23 n’ihuriro ry’Ingabo za Repubulika ya demokarasi ya Congo, yongeye gukara muri teritware ya Lubero mu ntara ya Kivu Yaruguru.
Amakuru ava i Lubero avuga ko “saa ine z’igitondo cyo kuri uyu wa kane, kwaribwo imirwano yatangiye aho yabereye i Kaseghe na Mighobwe,” uduce twegereye komine ya Kirumba. Ni imirwano yabaye hagati ya M23 na FARDC n’abambari bayo.
Ahar’ejo kandi iz’impande zombi zararwanye; ndetse uruhande rwa Leta ruza no gutangaza ko rwabohoje uduce twa Mighobwe na Kaseghe, usibye ko Minembwe.com yabwiwe n’abamwe mu barwanyi ba M23 ko ataribyo, hubwo ko ari bo bari muri utwo duce.
Ati: “M23 niyo iri Mighobwe na Kaseghe, no mu nkengero zayo. Bariya ibyo batangaza siko kuri ukuri ni uko bimeze, ni twe duhari.”
Iyi mirwano yabaye kuri uyu wa kane, ije ikurikira iyabaye ku wa mbere, ku wa kabiri no ku wa gatatu; aho yikurikiranyije iminsi ine, mu gihe abarwana bakabaye bari kubahiriza agahenge kasabwe n’ibiganiro by’i Luanda, bihuriweho n’u Rwanda, RDC na Angola.
Ku wa kabiri ushize, umuvugizi wa M23 mu bya politiki, Lawrence Kanyuka yatangaje ko uruhande rwabo rwatewe mu birindiro biherereye mu majyepfo ya Lubero.
Ariko nubwo uruhande rurwanirira Leta y’i Kinshasa arirwo rutangiza imirwano, biza kurangira M23 ibirukanye, kandi igakomeza kwagura ubutaka igenzura.