Ibyifatwa rya centre ya Masisi, FARDC yongeye kwivuguruza.
Ni mu butumwa bwatambutse ku mugoroba w’ejo hashize tariki ya 09/01/2025 bw’umvugizi w’igisirikare cya Repubulika ya demokarasi ya Congo, aho yatangaje ko “umutwe wa M23 wongeye kwigarurira centre ya Masisi.”
Hari mu kiganiro uyu muvugizi wa FARDC ku rwego rw’igihugu, Maj Gen Sylvain Ekenge yagiranye n’itangaza makuru i Kinshasa kikaba cyarananyujijwe kuri televisiyo y’igihugu ya RTNC aho yongeye gutangaza ko M23 yongeye kwisubiza zone ya Masisi.
Yagize ati: “Abarwanyi ba M23 bongeye kwisubiza zone ya Masisi. Intambara niko ihora, uyu munsi dushobora gutsindwa ariko nyuma intsinzi ikaba iyacu. Twizeye ko intsinzi izaba iyabanye-kongo. Ndabizeza ko tuzahisubiza.”
Mu ijoro ryo ku wa gatatu rishyira ku wa kane, uyu muvugizi nibwo yari yatangaje ko ingabo za FARDC zambuye umutwe wa M23 centre ya Masisi, aho yagize ati: “Ndemeza ko Ingabo za FARDC, zafashe umujyi munini wa Masisi, zagaruje kandi na Ngungu, ndetse zifata n’utundi duce duherereye hafi n’umujyi wa Sake hamwe na Bwerimana, Kimoka, Kaluba, Rutoboka na Bikataka.”
Kuruhande rwa M23 n’ubwo umuvugizi wa M23 atigeze agira icyo atangaza kuri ibi byari byatangajwe na FARDC, ariko umwe mu barwanyi b’uwo mutwe ya bwiye Minembwe.com ko tutagomba kwita kubitangazwa na Leta ya Kinshasa ngo kuko ikunze kwibeshera!
Yagize ati: “Njye ndi muri centre ya Masisi, ni twe tuhagenzura. Igitangaje nta n’intambara twahuye nayo kuva tuhafashe ku wa Gatanu w’icyumweru gishize.”
Uyu murwanyi yanavuze ko ayoboye ibatayo, ariko ko atemerewe gutanga amakuru, yashimangiye ibi agira ati: “Katanyama irabesha. Habe naho Ngungu ivuga ni twe tuhagenzura.”
Nyamara FARDC sibwo bwa mbere, itangaza ko hari uduce yambuye umutwe bahanganye mu gihe cy’imyaka itatu. Ibyo yabikoze no kuri Alimbongo, n’ahandi mu tundi duce two muri teritware ya Rutshuru mu mwaka ushize.
Kimweho, andi makuru ava i Masisi avuga ko ingabo za Congo n’abambari bazo bagerageje gutera ibirindiro bya Ngungu ku mugoroba wo ku wa gatatu, ariko ntibyabahira, hubwo bahatakariza abasirikare benshi barimo n’Abarundi aho ndetse muri abo bapguye barimo uwitwa Patience Gapara wari ufite ipeti rya Lieutenant n’abandi, nk’uko byakomeje gutangazwa ku mbugankoranyambaga z’Abarundi.
Aka gace ka Localité ya Ngungu, umutwe wa M23 umaze amezi icyenda warakigaruriye, kakaba gaherereye muri teritware ya Masisi.
Ni mu gihe centre ya Masisi yo, uwo mutwe urwanya ubutegetsi bwa perezida Félix Tshisekedi wayigaruriye mu cyumweru gishize, tariki ya 03/1/2025.