Ibigezweho ku mirwano hagati ya FARDC na M23 muri Kivu Yaruguru.
Nyuma y’imirwano ikomeye yahuzaga ihuriro ry’Ingabo za Congo n’umutwe wa M23, yasize uyu mutwe wigaruriye umujyi wa Sake uri mu birometero nka 27 uvuye mu mujyirwagati wa Goma mu Ntara ya Kivu Yaruguru.
Amasoko yacu avuga ko uru rugamba rwasize m23 ifashe umujyi wa Sake, rwatangiye mu masaha y’igicuku cy’iki gitondo cyo kuri uyu wa kane tariki ya 23/01/2025.
Nk’uko bivugwa urugamba rwavuye mu misozi yunamiye centre ya Sake aho abarwanyi b’uyu mutwe wa M23 bari bamaze iminsi bari garuriye ruratibuka neza hasi mu mujyirwagati ahari ikibaya.
Aya makuru akavuga ko habaye uguturika kw’ibibunda binini n’ibito, bityo ingabo zirwana ku ruhande rwa Leta zikuramo akabo karenge, ubundi M23 yigarurira umujyi wose n’inkengero zayo.
Amashusho yagiye hanze, agaragaza ririya huriro ry’ingabo za RDC, rigizwe na FARDC, ingabo z’u Burundi, MONUSCO, FDLR na Wazalendo barimo kwiruka bava muri uwo mujyi. Nk’uko ayo mashusho abigaragaza bahungaga bagana i Goma mu mujyi.
Ifatwa rya Sake ryatumye ibintu bihinduka i Goma ni mu gihe ingabo z’umuryango wa SADC n’iza MONUSCO zatangaje ko zatangiye kwimura ibirindiro byazo byari muri uyu mujyi. Iz’i ngabo zisobanura ko zirimo ku byimura kubera umutekano muke.
Byanatumye bamwe mu bategetsi b’iki gihugu banenga ingabo z’iyo miryango, uwa SADC n’umuryango w’Abibumbye; umwe mu badepite uri Goma watorewe muri teritware ya Masisi yagize ati: “SADC mbona nta kamaro kayo muri iyi ntambara turimo. MONUSCO yo rwose twasabye kuva kera ko ituvira mu gihugu, ni bagende.”
Kimwecyo mu itangazo rigenewe Abanyamakuru, umutwe wa M23 washyize hanze imenyesha ko uyu mutwe wa M23 nta makimbirane ufitanye na SAMIDRC ndetse na MONUSCO, bityo ko bakwiye kwigumira aho bari, ariko bakitandukanya n’ihuriro ry’Ingabo za RDC.
