Abasirikare ba Afrika y’Epfo baguye mu mirwano abandi benshi barakomereka muri RDC.
Ingabo za Afrika y’Epfo zatangaje ko abasirikare batatu babo bapfiriye mu mirwano bari bahanganyemo n’umutwe witwaje imbunda wa M23 mu bice biri hafi na Goma mu Burasirazuba bwa Repubulika ya demokarasi ya Congo.
Ni ubutumwa izi ngabo za Afrika y’Epfo zashyize hanze ku munsi w’ejo hashize tariki ya 25/01/2025, aho ubwo butumwa bumenyesha ko batatu bo muri izi ngabo bapfuye baguye mu mirwano abandi 14 barakomereka harimo abakomeretse bikabije.
Ubwo butumwa bugira buti: “Igitambo cyabo n’ibikomere abandi basirikare 14 ba Afrika y’Epfo bagiriye mu mirwano iri kubera muri iki gice, bitwibutsa ibyago abari kubungabunga amahoro n’umutekano bafite. Abenshi muri aba basirikare b’intwari ni abanyamuryango ba SANDU, bakoreye igihugu cyabo batizigama.”
Abasirikare ba Afrika y’Epfo bari mu ngabo z’umuryango wa Afrika y’Amajy’epfo (SAMIDRC) boherejwe mu Ntara ya Kivu y’Amajyaruguru kugira ngo bifatanye n’iza RDC kurwanya umutwe wa M23.
Ingabo ziri mu butumwa bwa mahoro bw’umuryango w’Abibumbye muri RDC (MONUSCO) na zo ziri kwifatanya n’iza RDC muri iyi ntambara, kuva tariki ya 23/01/2025, ubwo abarwanyi ba M23 binjiraga mu mujyi wa Sake.
Ubuyobozi bwa MONUSCO kuri uyu wa 24/01/2025 bwatangaje ko mu masaha 48 yashize, abasirikare 9 bari muri ubu butumwa bakomerekeye muri iyi ntambara, bane bakomeretse ku munsi wa mbere na batanu bakomeretse ku munsi wakurikiyeho.
Umutwe wa M23 waburiye SAMIDRC n’ingabo za MONUSCO, ibamenyesha ko izakoresha uburenganzira bwose ifite bwo kwirwanaho mu guhangana na bo. Ni ubutumwa yatanze, iteguza gufata Goma, nyuma ya Sake.
