Ushinzwe ibikorwa bya gisirikare mu biro bya perezida Tshisekedi ararira ayo kwarika.
Umusirikare ushinzwe ibikorwa bya gisirikare mu biro bya perezida Felix Tshisekedi muri Repubulika ya demokarasi ya Congo, General Frank Ntumba, akurikiranyweho icyaha cyo gushaka guhitana umukuru w’igihugu.
Mu ijoro ryo ku wa 17/07/2025, Gen Ntumba yahaswe ibibazo n’abashinzwe umutekano mu biro by’inama y’umutekano (CNS), aho yabazwaga umugambi wo kugirira nabi perezida Felix Tshisekedi. Ni nabwo yahise atabwa muri yombi.
Kuri ibi biro ni na ho kandi Gen Christian Tshiwewe wabaye umugaba mukuru w’Ingabo za Congo, wari umujyanama mukuru wa perezida Felix Tshisekedi mu bikorwa bya gisirikare, yahatiwe ibibazo akekwaho gushaka kwica Tshisekedi.
Amakuru avuga ko nubwo Gen.Ntumba yagumye mu nshingano, ariko abashinzwe iperereza bamukurikiranira hafi kuko mu kwezi kwa mbere uyu mwaka, ubwo Tshisekedi yari mu Busuwisi mu nama y’ihuriro mpuzamahanga ry’ubukungu, yamenyeshejwe ko uyu Gen.Ntumba ari umwe mu bashaka kumukura ku butegetsi.
Ni ibanga aya makuru akomeza avuga ko Tshisekedi yaribwiwe n’umushoramari w’Umunyamerika ufite n’ubwenegihugu bwa Israel,Moti Kahana, wari witabiriye inama y’iri huriro. Kahana ari mu bantu batatu Amerika yohereje i Kinshasa mu kwezi kwa gatatu kugira ngo baganire na Leta ya Congo ku ifungurwa ry’Abanyamerika bari bafungiweyo.
Uyu Gen.Ntumba ukurikiranyweho icyaha cyo kugambirira guhitana umukuru w’igihugu, yagiye muri izi nshingano zo kugenzura ibikorwa bya gisirikare mu biro by’umukuru w’igihugu kuva mu kwezi kwa munani umwaka wa 2020, asimbuye Lt.Gen.Jean Claude Yav.