Kivu y’Epfo, AFC/M23/MRDP igiye guha abaturage inoti zisimbura izishaje.
Guverineri w’intara ya Kivu y’Epfo, washyizweho n’ihuriro rya AFC/M23/MRDP-Twirwaneho rigamije gushyiraho akadomo kanyuma ubutegetsi bwa perezida Felix Tahisekedi wa Repubulika ya demokarasi ya Congo, Busa Bwa Ngwi Nshombo, yasabye abaturage gutanga inoti zishaje bafite kugira bahabwe izishya.
Bikubiye mu itangazo ubuyobozi bw’i ntara bwashyize hanze ku munsi wejo ku wa gatanu tariki ya 29/08/2025.
Iri tangazo riteweho umukono na guverineri, Busa Bwa Ngwi Nshombo rigira riti: “Abatuye muri Kivu y’Epfo baramenyeshwa ibi: “Buri wese ufite inoti z’amafaranga ya Congo zishaje, asabwe kuzigeza kuri banki ya CADECO i Bukavu. Zizasimbuzwa izindi zimeze neza kuburyo bungana.”
Muri iryo tangazo yasobanuye ko igikorwa cyo gusimburiza abaturage inoti zishaje kizakorwa ku buntu, asaba abayobozi bo mu nzego zitandukanye muri iyi ntara n’abo mu rwego rw’imari kugira uruhare mu migendekere myiza y’iyi gahunda.”
Intara ya Kivu y’Epfo iri muzabohowe na AFC/M23/MRDP hagati mu kwezi kwa kabiri uyu mwaka wa 2025, ubwo AFC /M23/MRDP yafataga umujyi wa Bukavu ufatwa nk’umurwa mukuru w’iyi ntara.
Ubwo yafataga uyu mujyi, Guverinoma ya RDC yahise ifata icyemezo cyo gufunga banki zikorera i Bukavu, bituma abaturage bagumana mu ngo zabo amafaranga bari baramaze kubikuza, abandi babura uko babitsa ayo babikuje.
Rero, kugira ngo hazamurwe urwego rw’imari rwahungabanyijwe n’icyemezo cya RDC, AFC/M23/MRDP yafunguye ikigega cya CADECO, gifite inshingano nk’iza banki, zirimo kubitsa, kubikuza no kugurizanya.
