Uri Ruguru yasobanuye uburyo FARDC, FDLR n’Ingabo z’u Burundi ziri gukorera Abanyamulenge jenoside
Byishimo Patrick uherereye mu misozi y’i Mulenge yasobanuye ko Ingabo za Repubulika ya demokarasi ya Congo, Ingabo z’u Burundi n’umutwe wa FDLR hamwe n’uwa Wazalendo bari kurimbura Abanyamulenge bakoresheje amayeri yo kubafungura amayira abahuza n’ibindi bice bahahiramo.
Bikubiye mu butumwa yatanze buri munyandiko, aho yagize ati: “Abaturage badafite aho bahuriye n’intambara bayibona gusa aruko batewe, ariko ikabagiraho ingaruka kubera gusa ari Abanyamulenge (Tutsi), kandi bivuye ku muteguro w’Ingabo z’iki gihugu n’icy’u Burundi. Iyi ni jenoside.”
Yakomeje ati: “Abanyamulenge bari mu Minembwe bafatiwe ambargo kuva mu kwezi kwa kabiri uyu mwaka, kugeza n’uyu munsi.”
Yavuze ko kuva icyo gihe nta miti babona, ibyo kurya, umunyu, isukari amavuta n’ibindi.
Yageze aha abaza iki kibazo ati: “Abaturage ibihumbi n’ibihumbi bobaho nta miti bagira ivura bigakunda?”
Asobanura ko ibi ari amayeri ya leta y’i Kinshasa n’iy’u Burundi mu bufatanye n’imitwe yitwaje intwaro byafashe kugira ngo birimbure Abanyamulenge.
Avuga ko hari amasezerano amahanga yasinyiye i Genève ajyanye n’intambara ko abaturage bagomba kurindwa n’uwo ari we wese urwana. Bivuze ko buri ruhande rwose rurwana rugomba kurengera umusivili.
Byishimo yavuze kandi ko muri ayo masezerano ajyanye n’intambara, iyo urwana akomeretse, cyangwa agafatwa n’uruhande yarwanaga narwo, ahita aba umusivili, bityo agakingirwa.
Ni naho yasobanuye ko MRDP-Twirwaneho, yagiye ifatira ku rugamba abarwanyi ba Mai Mai(Wazalendo), abasirikare b’u Burundi na FARDC ikabarekura, mu gihe uru ruhande rwo rurwana ku ruhande rwa Leta nta n’umwe rurafata ngo rumurekure.
Ati: “Nta we turumva wafashwe n’uruhande rwa Leta warekuwe, cyangwa byibuze ngo bavuge ko ahari bamubitse ahantu, bahita bamwica, ariko abo Twirwaneho yafashe bose yagiye ibarekura. Ibyo birazwi hose.”
Byishimo yakomeje avuga ko Leta kuba yarafashe iki cyemezo cyo kwicisha abaturage inzara n’indwara, ngo kubera ko ari Abatutsi, ibyo ni bigize jenocide.
Gusa atangazwa n’ukuntu amahanga acyecetse, ndetse n’uburyo hari Abanyamulenge bari muri iyo Leta ariko bakabifata nk’ibisanzwe.
Yagize ati: “Ntangazwa n’amahanga acyecetse, kandi Leta y’i Kinshasa yarafatiye Abanyamulenge ambargo yo kubamaraho bakoresheje kubafungira inzira z’isoko. Ikindi kintangaza ni uburyo muri iyi Leta harimo Abanyamulenge bakiyikorera, ese bo kobaraja he? Bazagera kuki benewabo nibamara gushyira?”
Inzira ivugwa yafunzwe ni yo kwa Mulima, kuko ihuza Minembwe n’ i Baraka, Fizi ku i zone n’i Uvira ndetse no mu bindi bice.
Yafunzwe nyuma y’aho umutwe wa MRDP-Twirwaneho ufashe Minembwe, iyo wafashe tariki ya 21/02/205. Kuva icyo gihe Ingabo zirwana ku ruhande rwa Leta zahise zifunga ibice byose byahahiranaga na Minembwe n’inkengero zayo.