PC Brigade Edinasi, Intwari Yiciwe i Lubumbashi Azira Ubwoko Bwe

PC Brigade Edinasi, Intwari Yiciwe i Lubumbashi Azira Ubwoko Bwe

PC Brigade Sebagabo Rwambara, wari uzwi cyane ku izina rya Edinasi, ari mu basirikare b’Abanyamulenge/Abatutsi biciwe mu bikorwa by’itotezwa rishingiye ku moko byabaye mu 1998 i Lubumbashi, mu cyahoze ari Katanga – ubu ni Haut-Katanga. Urupfu rwe rugarukwaho nk’icyo abatangabuhamya bita ikimenyetso cy’akarengane n’ivangura ry’ubutegetsi bwa Laurent-Désiré Kabila, wayoboye Repubulika ya Demokarasi ya Congo kuva mu 1997 kugeza mu 2001.

Mu mpera z’ukwezi kwa karindwi umwaka wa 1998, Edinasi yakiriye ubutumwa bumusaba kwitaba ku cyicaro cya Komanda Brigade i Lubumbashi. Akihagera, nk’uko abatangabuhamya babivuga, yahise akurwaho intwaro n’abamurindaga, ashyirwa mu maboko y’abasirikare bamushinjaga ko ari “Umunyamulenge.”

Nyuma y’iyicarubozo ryamaze amasaha make, Edinasi yahise yicwa urw’agashinyaguro, ari kumwe n’abasirikare bashinzwe umutekano we bavuga ururimi rw’ikinyamulenge. Mu bishwe barimo Muheto Bahanda, umurinzi we w’inkoramutima, Jean Pierre Kadahurwa, n’abandi benshi batazwi amazina bose.

Uyu mugambi wo kwica Abatutsi n’Abanyamulenge bose muri rusange mu ngabo za Kabila icyo gihe watangwaga nko “ukurandura Abatutsi,” ukaba waribasiye abasirikare bari bagize uruhare mu kugeza Kabila ku butegetsi mu 1997.

Ntaremerwa Notable, umwe mu barinzi ba Edinasi warokotse ubwo bwicanyi, avuga ko n’ubwo Komanda Brigade ari we watanze itegeko ryo kumwica, Edinasi yari umwe mu basirikare bitwaraga neza, kuko yari PC Brigade inshingano zikomeye. Yari ayoboye kandi ibikorwa byo guhugura abasirikare, yari SIO Course.

Notable yagize ati: “Yari umuyobozi w’intangarugero, udashobora kuba umwanzi w’igihugu.”

Edinasi yinjiye mu ngabo z’Inkotanyi mu 1993 avuye i Bujumbura, aho yari umwarimu mbere yo guhunga ubwicanyi bwibasiraye Abatutsi n’Abanyamulenge bari baragiye gushaka imirimo.

Yagize uruhare rukomeye mu rugamba rwo kubohora u Rwanda, kugeza ingabo z’Inkotanyi zifashe igihugu mu 1994. Mu 1996, yifatanyije n’abandi basirikare b’Abanyamulenge bambuka berekeza muri Repubulika ya Zaïre, gutabara ubwoko bwabo bwari mu kaga kubera itotezwa rya Leta ya Mobutu.

Mu rugamba rwo guhirika Mobutu, Edinasi n’itsinda rye bagize uruhare rukomeye kugeza Laurent-Désiré Kabila ku butegetsi mu 1997. Nyamara nyuma y’umwaka umwe gusa, ibyo byaje guhinduka “ingororano iryana,” ubwo Kabila yashinje Abanyamulenge bose kumugambanira, agatangiza ibikorwa byo kubica no kubirukana mu ngabo.

Abamuzi bemeza ko Edinasi yari umuyobozi w’inararibonye, ukunda ukuri, ushyira imbere uburenganzira bw’abatagira kivugira. Yaranzwe no:

Gutoza abasirikare be indangagaciro z’ubupfura

Kubabera urugero mu mirwano n’ubwitange

Guharanira umutekano n’uburenganzira bw’abantu be

Yari umusirikare udakorera igitutu, ahubwo ugendera ku ndangagaciro z’umwuga n’ubwitange budasanzwe.

Umucyo w’Izina rye mu Mateka

Nubwo Edinasi yishwe azira uko yavutse, izina rye rizakomeza kwibukwa mu mateka y’Abanyamulenge, mu mateka ya Congo, no mu rugamba rwo kurwanya ivangura rishingiye ku moko mu karere.

Azahora yibukwa nk’intwari:

Yaharaniye agaciro k’umuntu.

Urupfu rwe rurasubiza amaso inyuma ku bihe bikomeye byaranze amacakubiri n’itotezwa ryakomeje kurangwa mu karere, ariko n’ubu rukanibutsa ko amateka nk’ayo atagomba na rimwe kongera kuba.

Edinasi yagiye mu ijuru ritagira ivangura, ariko umucyo w’ubutwari bwe uracyamurika ku isi – nk’isomo, nk’ikirango, kandi nk’urwibutso rw’intwari itazibagirana.