RDC: Urubanza rwa Lt. Gen. Philémon Yav rwatangiye, ashinjwa ubugambanyi n’ibindi byaha bikomeye bibangamira umutekano w’igihugu
Urukiko Rukuru rwa Gisirikare muri Repubulika ya Demokarasi ya Congo rwatangaje ku mugaragaro itangizwa ry’urubanza rwa Lt. Gen. Philémon Yav, wahoze ayobora Akarere ka Gatatu ka Gisirikare gafite icyicaro muri Haut-Katanga, mu majyepfo y’iburasirazuba bw’igihugu. Uru rubanza rwatangiye kuri uyu wa Gatanu, tariki ya 19/12/ 2025, mu murwa mukuru Kinshasa.
Nk’uko bigaragara mu nyandiko z’ibirego zatanzwe n’ubushinjacyaha bwa gisirikare, Lt. Gen. Philémon Yav akurikiranyweho ibyaha bikomeye bikubiye muri dosiye ebyiri zitandukanye. Dosiye ya mbere imushinja ibyaha by’ubuhemu, birimo gushishikariza abasirikare gukora ibikorwa binyuranyije n’inshingano zabo z’akazi ndetse no kurenga ku mahame ya disipulini n’imiyoborere igenga igisirikare.
Dosiye ya kabiri, nk’uko byatangajwe ashinjwa ibyaha byo kugambanira igihugu no kugira uruhare mu bikorwa by’umutwe witwaje intwaro wigometse ku butegetsi buriho. Ibi byaha, nk’uko ubushinjacyaha bubivuga, byagize ingaruka zikomeye ku mutekano w’igihugu no ku bumwe bw’Ingabo za Repubulika ya Demokarasi ya Congo (FARDC).
Abasesenguzi bemeza ko uru rubanza ruri mu murongo w’ibikorwa by’ubutabera bwa gisirikare bigamije kongera icyizere mu miyoborere y’ingabo, kurwanya imyitwarire inyuranyije n’amategeko, no gushyira mu mucyo ibyaha bikomeye byibasira umutekano w’igihugu n’ubusugire bwacyo.
Lt. Gen. Philémon Yav yafashwe ku itariki ya 20/09/2022, atabwa muri yombi n’inzego z’umutekano, ashinjwa ibyaha byo kugambanira igihugu no kugerageza guhirika ubutegetsi. Kuva icyo gihe, afungiye i Kinshasa ategereje kuburanishwa.
Itangizwa ry’uru rubanza ririkurikirwa n’abaturage, imiryango iharanira uburenganzira bwa muntu n’abafatanyabikorwa mpuzamahanga, bakurikiranira hafi uko ubutabera bwa gisirikare muri RDC bukomeje kwifata mu gukemura imanza zirebana n’umutekano n’imiyoborere y’igihugu.