BREAKING NEWS: Urukiko Rukuru rwa Amerika Rwanze Gahunda ya Trump yo Kohereza Ingabo za Leta mu Mujyi wa Chicago
Urukiko Rukuru rw’Amerika rwafashe umwanzuro ukomeye kuri uyu wa Mbere, rwanga ubusabe bwa Perezida Donald Trump bwo kohereza ingabo za Leta (National Guard) mu gace ka Chicago, aho yifuzaga kongera ikoreshwa ry’ingufu za gisirikare mu gucunga umutekano mu duce tunengwa na guverinoma ayoboye.
Ibi bibaye mu gihe Trump akomeje kwagura gahunda ye yo gukoresha ingabo za Leta mu turere tuyobowe n’Abademokarate, ashingiye ku mpamvu z’umutekano w’imbere mu gihugu. Gusa iyi gahunda yakomeje kunengwa n’impande nyinshi zivuga ko yica amahame ya demokarasi, ndetse ikaba ishobora gukoreshwa mu nyungu za politiki aho gukemura ibibazo byugarije abaturage.
Urukiko Rukuru rwasobanuye ko icyo cyemezo cya Trump kinyuranyije n’amategeko agenga ikoreshwa ry’ingabo mu gihugu imbere, ndetse ko gishobora kubangamira uburenganzira bw’ibanze bw’abaturage. Abasesenguzi bavuga ko uru rubanza rushobora kuba ishingiro ry’imitegekere mishya y’ikoreshwa ry’ingabo mu butegetsi bwa gisivile muri Amerika.
Ni urundi rugamba rwa politiki hagati ya Trump n’abayobozi b’uturere twiganjemo Abademokarate, barimo n’aba Chicago, bamaganye “igisa n’igeragezwa ryo gushyira igitutu cya gisirikare ku baturage mu rwego rwo kubacecekesha.”
Turakomeza kubakurikiranira hafi uko iyi nkuru ikomeza kugenda, n’ingaruka zayo ku mutekano n’imiyoborere ya Leta Zunze Ubumwe za Amerika.