Ibihugu Bitanu Birimo na RDC Byinjiye mu Nama y’Umutekano ya Loni
Ku wa Kane, tariki ya 01/01/2025, ku cyicaro gikuru cy’Umuryango w’Abibumbye (Loni) i New York muri Leta Zunze Ubumwe za Amerika, habereye umuhango wo kuzamura amabendera y’ibihugu bitanu byatorewe kuba abanyamuryango batari bahoraho b’Inama y’Umutekano ya Loni. Ibyo bihugu ni Bahireyini (Bahreïn), Kolombiya, Repubulika ya Demokarasi ya Kongo (RDC), Letoniya (Lettonie) na Liberia.
Uyu muhango ufatwa nk’uw’amateka, kuko ugaragaza intambwe ikomeye ibi bihugu byateye mu kwinjira mu rwego rwo hejuru rushinzwe gufata ibyemezo bikomeye ku bibazo byugarije isi, by’umwihariko ibijyanye no kubungabunga amahoro n’umutekano mpuzamahanga, gukemura amakimbirane ya politiki, no gushakira hamwe ibisubizo birambye ku bibazo by’umutekano.
Nubwo ibi bihugu byinjiye muri iyi nama y’Umutekano nk’abanyamuryango batari bahoraho, bityo ntibigire ububasha bwa veto bufitwe n’ibihugu bitanu bihoraho, bigira uruhare rufatika mu biganiro, mu gutanga ibitekerezo ku ngingo zitandukanye, no mu gutegura no gutora imyanzuro igenga amahoro n’umutekano ku isi.
Muri urwo rwego, Repubulika ya Demokarasi ya Kongo na Liberia byiyongereye ku itsinda ry’ibihugu bitatu by’Afurika (A3) bihagarariye umugabane muri iyi Nama y’Umutekano. Ibyo bihugu bifite inshingano zo kugaragaza no kurengera inyungu za Afurika, no guhuza imyanzuro y’Inama y’Umutekano n’ibyemezo n’amabwiriza by’Ubumwe bw’Afurika ku bijyanye n’umutekano w’umugabane.
Iyi ni inshuro ya gatatu Repubulika ya Demokarasi ya Kongo yinjira mu Nama y’Umutekano ya Loni, nyuma yo kuyibamo mu bihe bya 1982–1983 ndetse na 1990–1991, ibintu byongera kugaragaza uruhare rwayo mu bikorwa bya dipolomasi no mu guharanira amahoro n’umutekano ku rwego mpuzamahanga.