Uvira: Umubare w’Abishwe mu Ijoro Wiyongereye, Abaturage Baratakamba
Amakuru yizewe aturuka mu mujyi wa Uvira, mu Ntara ya Kivu y’Amajyepfo, aravuga ko umubare w’abantu baraye bishwe barashwe wiyongereye ku buryo bugaragara, bikarushaho gukaza umwuka w’ubwoba n’umutekano muke mu baturage.
Mu makuru ya mbere yari yatangajwe, havugwaga ko hapfuye abantu batanu. Icyakora, amakuru Minembwe Capital News yahawe n’inzego z’umutekano yemeza ko mu ijoro ryo ku wa Mbere rishyira ku wa Kabiri, tariki ya 20/01/2026, umubare w’abishwe warenze icumi. Haracyakorwa iperereza n’ikorwa ry’ishakisha ry’indi mirambo, kuko hari imiryango ivuga ko yabuze ababo.
Ibi byabaye nyuma y’aho mu mujyi humvikanye amasasu menshi mu ijoro, bivugwa ko yaraswaga n’ingabo za FARDC ku bufatanye na FDLR n’imitwe ya Wazalendo. Mu bamaze kumenyekana mu bishwe harimo umugabo wo mu bwoko bw’Abapfulero witwa Cadeau, wari umushoferi, wiciwe mu gace ka Kambulungu, ashinjwa gukorana n’umutwe wa M23—nubwo nta bimenyetso byigeze bitangazwa na FARDC byemeza ibi birego. Undi wishwe ni Mayele, warasiwe ahitwa Kavimvira. Hari kandi undi muntu wiciwe muri Quartier Nyamianda, mu gihe amazina y’abandi benshi ataramenyekana.
Aya mahano abaye mu gihe umujyi wa Uvira ugenzurwa n’ingabo za FARDC, FDLR na Wazalendo, nyuma y’uko AFC/M23 iwuvuyemo mu ijoro ryo ku wa Gatandatu w’icyumweru gishize. Abaturage bavuga ko ibikorwa by’ingabo zirwana ku ruhande rwa Leta bidashobora kwihanganirwa, bagasaba ishyirwaho ry’umutekano urambye.
Bamwe mu baturage bagaragaza ko mu gihe M23 yagenzuraga umujyi bari bafite amahoro n’umutekano, nyuma y’uko yawigaruriye tariki ya 09/12/2025. Bavuga ko igitutu cya Leta Zunze Ubumwe za Amerika cyatumye M23 iwuvamo mu rwego rwo gushyigikira ibiganiro by’amahoro, ariko ingaruka z’icyo cyemezo zikaba zikomeje kugaragara mu mibereho y’abaturage.
Umwe mu baturage bo muri Uvira yagize ati: “Nta mutekano dufite; birasaba ko abantu birinda kuva mu mazu.” Yakomeje agira ati: “Niba M23 yadukundira ikagaruka ikadukiza aba bajura, twabyishimira; ntitubashaka na busa.”
Usibye ubwicanyi, ingabo za FARDC, FDLR na Wazalendo zishinjwa kandi gusahura imitungo y’abaturage, kwiba no gusenya ibikorwa remezo mu bigo bya Leta n’iby’abikorera ku giti cyabo byakoraga muri Uvira, ibintu bikomeje guhungabanya bikomeye ubukungu n’imibereho y’abaturage.
Abaturage basaba ubutabazi bwihuse, ishyirwaho ry’umutekano uhamye, ndetse n’ikorwa ry’iperereza ryigenga ku byabaye, kugira ngo abakoze ibi byaha baryozwe ibyo bakoze kandi umujyi wa Uvira usubizwe mu nzira y’amahoro arambye.