FARDC Yongeye Kugaba Ibitero mu Misozi y’i Mulenge
Mu gitondo cyo kuri uyu wa Mbere tariki ya 02/02/2026, inkuru zizewe zituruka mu misozi miremire y’i Mulenge, muri teritwari ya Minembwe, mu Ntara ya Kivu y’Amajyepfo mu burasirazuba bwa Repubulika Iharanira Demokarasi ya Congo (RDC), zemeza ko urusaku rw’intwaro ziremereye n’izoroheje rwongeye kumvikana cyane, by’umwihariko mu bice bya Muliza na Gekenke.
Aya masasu n’ibiturika byatangiye kumvikana mu masaha ya kare y’igitondo, bikaba byongeye kugaragaza ko umutekano ukomeje kuzamba muri aka gace kamaze igihe kari mu mvururu z’intambara n’imirwano ihoraho.
Amakuru aturuka mu baturage no mu masoko yizewe agaragaza ko ingabo za Leta ya Kinshasa (FARDC), zifatanyije n’ingabo z’u Burundi, imitwe yitwaje intwaro ya Wazalendo, ndetse n’abarwanyi ba FDLR, ari bo bagabye ibitero ku mutwe wa MRDP-Twirwaneho, ibitero bivugwa ko byibasiye n’abaturage batuye muri ibyo bice.
Gusa, amakuru ahari avuga ko MRDP-Twirwaneho yashoboye kwitabara no gusubiza inyuma izo ngabo, ikabuza ibitero byabo kugera ku ntego.
Ibi bitero by’uyu munsi bikurikiye ibyabaye ku Cyumweru tariki ya 01/02/2026, aho MRDP-Twirwaneho nanone yasubije inyuma ibitero byagabwe na FARDC n’abambari bayo mu nkengero za Mikenke, muri teritwari ya Mwenga.
Hari kandi amakuru avuga ko ibitero Leta yagabye ku baturage byaturutse mu bice bya grupema ya Mutambara, muri teritwari ya Fizi, bikaba byarushijeho gutuma impungenge z’umutekano ziyongera mu baturage bo muri aka karere.
Mu misozi y’i Mulenge, intambara imaze iminsi ikomeje, aho bivugwa ko yatangiye mu ntangiriro z’icyumweru gishize. Muri iyo mirwano, MRDP-Twirwaneho yigaruriye uduce twinshi two mu nkengero za Point Zero, harimo nka Nguli, Nakiheli, n’utundi duce dutandukanye.
Kugeza ubu, amakuru yemeza ko MRDP-Twirwaneho igikomeje kugenzura Point Zero, ndetse na Gipupu, Minembwe, Mikenke, n’ibindi bice byinshi byo mu misozi miremire y’i Mulenge, birimo i Ndondo muri grupema ya Bijombo, ndetse no mu gace ka Rurambo.
Iyi mirwano ikomeje guterwa impungenge n’abaturage ndetse n’abakurikirana ibibera muri aka gace, kubera ingaruka zikomeye ku buzima bw’abasivili, kwimurwa kw’abaturage, no kwiyongera kw’ibibazo by’ubutabazi. Bivugwa ko hatabayeho igisubizo kirambye cya politiki n’umutekano, akarere k’i Mulenge kazakomeza kuba indiri y’intambara n’umutekano muke.