Impuruza ku Byago Bikomeye Biri Kwibasira Abanyamulenge muri RDC
Umuryango Ubumwe bw’Abanyamulenge ku rwego mpuzamahanga (UBM) wasohoye itangazo rikomeye rigenewe abanyakuru b’ibihugu byo mu Karere k’Ibiyaga Bigari n’imiryango mpuzamahanga, ubasaba gutabara byihuse Abanyamulenge bavuga ko bari mu kaga gakomeye ko kurimburwa muri Repubulika Iharanira Demokarasi ya Congo .
Iri tangazo ryandikiwe Perezida Félix Tshisekedi wa RDC, Perezida Évariste Ndayishimiye w’u Burundi, Perezida Paul Kagame w’u Rwanda, Perezida Yoweri Kaguta Museveni w’u Bugande, ndetse n’Uhagarariye Umuryango w’Abibumbye ushinzwe ubumwe n’ubwiyunge muri Afurika y’Iburasirazuba. Intego nyamukuru yaryo ni ukugaragaza impungenge zikomeye ku mibereho n’umutekano w’Abanyamulenge, bagize igice cy’Abatutsi baba mu burasirazuba bwa RDC .
UBM ivuga ko Abanyamulenge bakomeje kwibasirwa n’ibitero bikomeye birimo ubwicanyi, gutwikirwa amazu, gusahurwa kw’amatungo, n’ihohoterwa rikorerwa abagore n’abana. By’umwihariko, uyu muryango uvuga ko hari ibimenyetso by’ibitero byo mu kirere bikoreshejwe drones, bivugwa ko byahitanye abaturage b’inzirakarengane, bigatuma ubwoba n’akaga birushaho gufata indi ntera .
Mu itangazo ryabo, UBM ivuga ko ibi bikorwa bishinjwa ingabo za Leta ya RDC (FARDC), imitwe yitwaje intwaro irimo Wazalendo, FDLR, ndetse n’ingabo z’u Burundi (FDNB). Ibi bifatwa nk’igikorwa gifite intego yo guca intege no kurimbura burundu Abanyamulenge mu gihugu cyabo cy’amavuko .
UBM ishimangira ko ibyiyongera by’ibi bitero bishobora kuganisha ku byago bya Jenoside, mu gihe amahanga n’abayobozi b’akarere bateye intambwe ifatika yo kurengera abasivili. Uyu muryango unenga bikomeye amahanga, uvuga ko hari kwirengagiza ku bushake ibiri gukorerwa Abanyamulenge, ndetse ugashinja umuryango mpuzamahanga kugira uruhare mu nyungu zawo bwite aho kurengera ubuzima bwa muntu.
Mu butumwa bwabo, UBM irahamagarira abayobozi b’ibihugu n’imiryango mpuzamahanga gufata ingamba zihuse kandi zifatika zo kurinda abagore, abana n’abageze mu zabukuru, no gusigasira ibyabo bisigaye. Icyakora, ivuga ko mu gihe nta gisubizo kibonetse, Abanyamulenge n’abandi bose bafite umutima wo kurengera abarengana baziyemeza kwirwanaho kugira ngo barokore ubuzima bw’abana n’ababyeyi babo .
Iki kibazo cy’Abanyamulenge kigaragazwa nk’ikitari ikibazo cy’igihugu kimwe gusa, ahubwo nk’ikibazo gishobora guhungabanya umutekano w’akarere kose k’Ibiyaga Bigari, mu gihe cyirengagijwe. UBM isaba ko hakorwa iperereza mpuzamahanga ryigenga, hagashyirwaho ingamba zo gukumira ibyaha byibasiye inyokomuntu, ndetse hakubahirizwa uburenganzira bwa buri wese nta vangura .
