Amerika Yemeje Ko Yahanuye Drone ya Irani
Igisirikare cya Leta Zunze Ubumwe za Amerika cyatangaje ko cyahanuye indege nto y’intambara ya Irani itajyamo umupilote (drone), yari iri kugerageza gusatira ubwato rutura bw’Amerika bwikorera indege z’intambara, mu nyanja y’Abarabu. Iki gikorwa kivugwa ko cyabaye mu rwego rwo kwirinda no kurinda umutekano w’abasirikare n’ibikoresho bya gisirikare by’Amerika.
Kapiteni Tim Hawkins, umuvugizi w’ibiro bikuru by’ingabo z’Amerika, yatangaje ko iyo drone yahanuwe ku wa kabiri, ubwo yarimo “yegera mu buryo buteye impungenge” ubwato bw’intambara bwa USS Abraham Lincoln. Yongeyeho ko igikorwa cyo kuyihanura cyakozwe n’indege y’intambara yo mu bwoko bwa F-35C, yahagurukiye kuri ubwo bwato, hagamijwe gukumira icyashoboraga gushyira mu kaga umutekano wabwo.
Amakuru yatanzwe n’ingabo z’Amerika agaragaza ko ubwo bwato bwari buri mu ntera ya kilometero zigera hafi ku 800 uvuye ku nkombe za Irani, mu gihe iyo drone yabwegerezaga mu mugambi wavuzwe ko “udasobanutse neza”. Nta cyangiritse ku bikoresho bya gisirikare by’Amerika, ndetse nta musirikare wagize ikibazo icyo ari cyo cyose.
Ibi bibaye mu gihe Amerika ikomeje kongera ingabo n’ibikoresho bya gisirikare mu karere k’Uburasirazuba bwo Hagati, ahamaze igihe hagaragara umwuka mubi n’ubwumvikane buke hagati ya Washington na Tehran. Nubwo Amerika yatangaje aya makuru, ubutegetsi bwa Irani nta cyo buratangaza ku mugaragaro ku byabaye.
Perezida wa Leta Zunze Ubumwe za Amerika, Donald Trump, aherutse kongera kugaragaza ko igihugu cye gishobora gukoresha imbaraga za gisirikare mu gihe Irani yakomeza kwanga kujya mu biganiro bigamije kugabanya no kugenzura gahunda yayo ya nikleyeri. Yigeze kandi gutangaza ko Amerika ishobora kugira icyo ikora ku ihashya ry’imyigaragambyo y’abaturage muri Irani, yakurikiwe n’urupfu rw’abantu.
Nyuma y’ihanurwa ry’iyo drone, Karoline Leavitt, umuvugizi w’ibiro bya Perezida wa Amerika, yabwiye televiziyo Fox News ko ibiganiro hagati ya Amerika na Irani bigiteganyijwe kuba muri iki cyumweru. Yavuze ko Perezida Trump “akomeje gushyira imbere inzira ya dipolomasi,” ariko ashimangira ko “amahitamo yose akiri ku meza,” harimo n’ayo gukoresha ingufu za gisirikare mu gihe byaba ngombwa.
Ku rundi ruhande, Umuyobozi w’ikirenga wa Irani, Ayatollah Ali Khamenei, aherutse kuburira ko igitero icyo ari cyo cyose cyagabwa ku gihugu cye cyashobora gutuma habaho intambara ikomeye mu karere kose, bityo bigashyira mu kaga umutekano w’isi yose.