FARDC n’Abafatanyabikorwa Bayo Bashinjwe Kwibasira Imihana Ituwe n’Abanyamulenge
Ihuriro Alliance Fleuve Congo (AFC/M23) rirwanya ubutegetsi bwa Repubulika Iharanira Demokarasi ya Congo, ryashinje Ingabo za Leta (FARDC) gukoresha indege zitagira abapilote zizwi nka drones mu bitero bivugwa ko byibasiye abasivile, bikabaviramo kubura ubuzima, kwimurwa ku gahato no kwangirika kw’ibyabo.
Mu itangazo ryashyizwe ahagaragara none ku Cyumweru tariki ya 22/03/2026, AFC/M23 yavuze ko mu ijoro ryo ku wa gatandatu, ingabo za FARDC zifatanyije n’imitwe iyishyigikiye zagabye ibitero mu duce dutuwe cyane two mu misozi ya Gakenke, Kalingi, ndetse no muri Centre ya Minembwe, mu Ntara ya Kivu y’Amajyepfo. Iryo huriro rivuga ko ibyo bitero byahitanye ubuzima bw’abaturage b’abasivile, abandi bagahunga ingo zabo, mu gihe ibikorwa remezo n’imitungo byangiritse ku buryo bugaragara.
AFC/M23 isobanura ko ikoreshwa rya drones mu duce dutuwe n’abasivile ari igikorwa cyiyongera ku mbaraga z’intambara kigamije gutera ubwoba abaturage no kubambura uburenganzira bwo kubaho mu mutekano. Ibi bije bishimangira ibirego iri huriro rimaze igihe rishyira ku ngabo za Leta, ribashinja gukoresha uburyo bukabije mu guhangana n’imitwe irwanya ubutegetsi.
Ku rundi ruhande, Ingabo za FARDC ntizari zatangaza icyo zivuga kuri ibi birego bya AFC/M23. Gusa, mu bihe byashize, ubuyobozi bw’igisirikare cya Congo bwagiye buhakana kenshi ibirego byo kwibasira abasivile, bugashimangira ko bugamije kurwanya imitwe yitwaje intwaro ihungabanya umutekano w’igihugu.
Iyi nkuru ije yiyongera ku mpungenge mpuzamahanga ku ikoreshwa ry’ikoranabuhanga rya gisirikare rigezweho mu ntambara zo mu burasirazuba bwa Congo. Vuba aha, Leta Zunze Ubumwe za Amerika zasabye impande ziri mu mirwano guhagarika ikoreshwa rya drones zihitana ubuzima bwabantu(suicide drones), nyuma y’ibitero byabereye mu mujyi wa Goma bikica umukozi w’ishami ry’Umuryango w’Abibumbye ryita ku bana (UNICEF) ndetse n’abandi basivile.
Amateka y’ikorwa ry’intambara mu burasirazuba bwa Congo agaragaza ko aka karere kamaze imyaka irenga makumyabiri karanzwe n’imirwano ihoraho, irimo imitwe myinshi yitwaje intwaro iharanira inyungu zitandukanye, zirimo iza politiki, ubukungu n’umutekano. Umutwe wa M23 wongeye kubura imbaraga mu myaka ya vuba, nyuma yo kongera kubyutsa ibikorwa byawo mu 2021, uvuga ko uharanira uburenganzira bw’abaturage bamwe bavuga ko bahezwa.
Nubwo AFC/M23 na yo yigeze kwigamba ibitero byagabwe ku kibuga cy’indege cya Kisangani mu minsi ishize, ibintu bikomeje kongera ubukana bw’intambara, abasesenguzi bagaragaza ko gukoresha drones n’ibindi bikoresho bya gisirikare bigezweho bishobora kurushaho kongera ibyago ku basivile, cyane cyane mu duce dutuwe cyane.
Umuryango mpuzamahanga ukomeje gusabwa kugira uruhare rufatika mu guhagarika iyi mirwano, cyane cyane urengera abasivile bakomeje kugirwaho ingaruka zikomeye n’intambara imaze igihe kirekire. Abaturage bo muri utu duce, cyane cyane abo muri Minembwe n’ahandi hugarijwe n’imirwano, bakomeje gusaba amahoro arambye n’uburinzi bwizewe, mu gihe impande zihanganye zishinjanya ibikorwa by’ubugizi bwa nabi.
Ibi birego bishya bikomeje gushyira igitutu ku mpande zose ziri mu ntambara, mu gihe amahanga asaba ko habaho ibiganiro byimbitse by’amahoro bishobora kugarura ituze mu burasirazuba bwa Congo bumaze igihe bwugarijwe n’umutekano muke.