RDC: Intambwe Ikomeye Ishingiye ku Masezerano ya Washington Hagati ya RDC n’u Rwanda
Igisirikare cya Repubulika Iharanira Demokarasi ya Congo (FARDC) cyatangaje ko cyatangiye igikorwa gikomeye cyo guhiga no gushakisha abarwanyi b’umutwe wa FDLR bagikomeje kugaragara ku butaka bwa Congo. Iki gikorwa cyatangijwe ku Cyumweru, tariki ya 29/03/2026, mu mujyi wa Kisangani mu ntara ya Tshopo, gishingiye ku ishyirwa mu bikorwa ry’amasezerano aherutse kugerwaho i Washington hagati ya Leta ya RDC n’iy’u Rwanda.
Umuhango wo gutangiza ku mugaragaro iki gikorwa wayobowe na Jenerali Ychaligonza Jacques, umuyobozi wungirije w’ingabo ku rwego rw’icyicaro gikuru (État-major général), wabereye mu kigo cya gisirikare cya Camp Général Bauma i Kisangani. Muri uwo muhango, hagaragajwe ko nibura batalyo eshatu z’ingabo za FARDC zamaze gushyirwa ku murongo kugira ngo zitangire ako kazi katoroshye ko guhiga no kurandura burundu imitwe yitwaje intwaro idakurikiza amategeko ya Leta.
Abasirikare ba FARDC basabwe gukora akazi kabo mu buryo bwubahiriza amategeko mpuzamahanga arengera uburenganzira bwa muntu, mu gihe abarwanyi ba FDLR basabwe gushyira intwaro hasi no kwiyambura ibikorwa by’intambara. Ubuyobozi bwa gisirikare bwatangaje ko abazishyikirizwa bazakusanyirizwa hamwe (cantonnement) mu mujyi wa Kisangani, mbere yo koherezwa mu Rwanda, mu gikorwa kizagenzurwa n’imiryango mpuzamahanga.
Iki gikorwa kije mu gihe ikibazo cy’umutekano muke mu burasirazuba bwa RDC kimaze imyaka myinshi, by’umwihariko bitewe n’imitwe yitwaje intwaro irimo na FDLR, umutwe washinzwe n’abarwanyi basize bakoze Jenoside yakorewe Abatutsi mu 1994 mu Rwanda, bakaza guhungira mu mashyamba ya Congo. Mu myaka yakurikiyeho, uyu mutwe wakomeje gushinjwa guhungabanya umutekano w’akarere no guteza amakimbirane hagati ya RDC n’u Rwanda.
Amasezerano ya Washington agaragazwa nk’intambwe nshya mu gushaka umuti urambye w’iki kibazo kimaze igihe kirekire. Ayo masezerano agamije cyane cyane gukuraho impamvu z’umutekano muke, harimo no gusenya burundu imitwe nka FDLR, ndetse no guteza imbere ubufatanye mu bya gisirikare n’umutekano hagati y’ibihugu byombi.
Nubwo bimeze bityo, abasesenguzi bagaragaza ko ishyirwa mu bikorwa ry’iyi gahunda rizasaba ubushake bwa politiki bukomeye, ubufatanye bwimbitse hagati y’impande zose bireba, ndetse n’uruhare rugaragara rw’umuryango mpuzamahanga mu kugenzura no gushyigikira iki gikorwa.
Mu by’ukuri, iki gikorwa cya FARDC gishobora kuba intambwe ikomeye iganisha ku mahoro arambye mu burasirazuba bwa RDC, ariko bizaterwa n’uko kizashyirwa mu bikorwa, ubwitange bw’impande zose, ndetse n’uko abarwanyi ba FDLR bazitabira gahunda yo gushyira intwaro hasi bagasubira mu buzima busanzwe.