I Mulenge Hongeye Kwinjira mu Bihe Bikomeye: Ibisasu Byibasiye Imihana y’Abaturage n’Amatungo
Amakuru aturuka mu misozi y’i Mulenge, mu Ntara ya Kivu y’Amajyepfo mu Burasirazuba bwa Repubulika Iharanira Demokarasi ya Congo (RDC), aravuga ko ihuriro rigizwe n’ingabo za FARDC, ku bufatanye n’ingabo z’u Burundi, abarwanyi ba Wazalendo ndetse n’umutwe wa FDLR, ryagabye ibitero ryifashishije ibisasu mu duce dutuwe n’Abanyamulenge, bikangiza byinshi ndetse bikica amatungo menshi.
Nk’uko amakuru yizewe abaturage bo muri ako karere bahaye Minembwe Capital News abivuga, ibyo bisasu byarashwe hifashishijwe indege zitagira abapilote (drones) mu masaha y’ijoro, nyuma y’iminsi itatu yari ishize hagaragara ituze ugereranyije n’ibihe byabanje.
Agace ka Gakenke, gaherereye mu bilometero bike uvuye mu mujyi wa Minembwe, ni kamwe mu duce twibasiwe cyane n’ibi bisasu. Amakuru yemeza ko nibura inka 28 z’Abanyamulenge zahiciwe n’ibisasu byaguye muri ako gace.
Abaturage bavuga ko ayo matungo yari umutungo w’imiryango itandukanye, bityo urupfu rw’ayo matungo rukaba rubasigiye igihombo gikomeye, cyane cyane ko ubworozi bw’inka ari bwo shingiro ry’ubukungu n’imibereho y’abatuye i Mulenge.
Umwe mu baturage wavuganye na Minembwe Capital News yagize ati:
“Twari tumaze iminsi mike twumva hari ituze. Mu ijoro ryo ku wa Mbere, ahagana saa tanu z’ijoro, twumvise urusaku rw’ibisasu byinshi. Mu gitondo dusanga inka nyinshi zapfuye, izindi zakomeretse, ndetse abaturage bafite ubwoba bwinshi.”
Amakuru akomeza avuga ko Gakenke atari ho honyine ibyo bisasu byaguye. Hari n’andi makuru yemeza ko ibisasu byageze no mu tundi duce dutandukanye twa Minembwe, nubwo kugeza ubu hataramenyekana imibare nyakuri y’ibyangiritse muri buri gace.
Abaturage bo muri utwo duce bavuga ko bumvise urusaku rw’ibisasu byinshi byaturikaga mu bihe bitandukanye by’ijoro, ibintu byatumye benshi bahunga ingo zabo bakarara bihishe mu bihuru no mu misozi kugira ngo birinde ingaruka z’ayo masasu.
Iki gitero kibaye nyuma y’igihe gito cyari kimaze kugaragaramo ituze. Ku wa Gatandatu, ku Cyumweru no ku wa Mbere ku manywa, abaturage bari batangiye gusubukura ibikorwa byabo bya buri munsi birimo ubworozi n’ubuhinzi.
Gusa, uko bwije ni ko ibintu byahindutse, aho abaturage bavuga ko ahagana saa tanu z’ijoro ari bwo hatangiye kumvikana urusaku rw’indege zitagira abapilote (drones), hakurikiraho kuraswa kw’ibisasu byaguye mu mihana itandukanye.
Abasesenguzi bavuga ko gukomeza kurasira mu bice bituwe n’abasivili bishobora kurushaho guteza ikibazo cy’ubuhunzi, inzara ndetse n’ihungabana mu baturage basanzwe bamaze imyaka myinshi bahura n’ingaruka z’intambara.
Abaturage b’i Mulenge basaba ko hakorwa ibishoboka byose kugira ngo umutekano wongerwe, abaturage barindwe, kandi ibikorwa bya gisirikare bitagira ingaruka ku basivili n’amatungo yabo.
Minembwe Capital News irakomeza gukurikirana aya makuru kugira ngo ibagezeho amakuru arambuye uko agenda amenyekana.