Ubuhamya Bukomeye bwa Bola, Wahoze muri FDLR: Ashinja u Burundi na RDC Gutegura Kurimbura Abanyamulenge
Uwahoze ari umwe mu bayobozi bakuru b’urwego rw’iperereza rwa FDLR, Bola, yashyize ahagaragara ubuhamya bukubiyemo ibirego bikomeye, avuga ko hari gahunda imaze igihe kinini ivugwaho guhuza FDLR, bamwe mu bayobozi ba Repubulika Iharanira Demokarasi ya Congo (RDC) n’u Burundi, igamije kurimbura abaturage b’Abatutsi bo mu karere, by’umwihariko Abanyamulenge batuye mu misozi miremire y’i Mulenge, Minembwe, no ku Ndondo muri Gurupoma ya Bijombo, mbere y’uko iyo gahunda yaguka ikagera no mu bindi bice by’akarere.
Nk’uko ubu buhamya bubivuga, iyo gahunda yateguwe mu rwego rw’ubufatanye bw’amatsinda n’inzego zitandukanye. Icyakora, kugeza ubu nta perereza ryigenga riratangazwa ryemeza cyangwa rihakana ibyo birego. Kubera uburemere bwabyo, havutse ubusabe bw’uko hakorwa iperereza ryimbitse kandi ridafite aho ribogamiye.
Abashyize ahagaragara ubu buhamya basabye Urukiko Mpuzamahanga Mpanabyaha (CPI) gutangiza iperereza ryigenga kugira ngo hasuzumwe ukuri kw’ibikubiye muri bwo, hamenyekane niba hari abantu cyangwa inzego zaba zifite uruhare mu byavuzwe. Mu gihe byagaragara ko hari ibyaha byakorewe abaturage, basabye ko ababigizemo uruhare babihanirwa hakurikijwe amategeko mpuzamahanga.
Bola watanze ubu buhamya yanahamagariye abaturage ba Repubulika Iharanira Demokarasi ya Congo kwirinda kwinjira cyangwa gushyigikira ubukangurambaga ubwo ari bwo bwose bushingiye ku rwango rushingiye ku moko cyangwa bushishikariza ihohoterwa. Yavuze ko amateka yagaragaje ko ibikorwa nk’ibyo byateje imibabaro ikomeye, bigahitana ubuzima bwa benshi ndetse bigasenya imibereho y’abaturage, nyamara ntibizane igisubizo kirambye.
Bongeye gushimangira ko kurinda abasivili, kubahiriza amategeko mpuzamahanga arengera ikiremwamuntu ndetse n’amategeko agenga intambara ari byo bikwiye gushyirwa imbere kurusha ibindi byose, cyane cyane mu gihe uburasirazuba bwa RDC bukomeje guhura n’ibibazo bikomeye by’umutekano n’amakimbirane yitwaje intwaro.
Nk’uko amakuru twahawe abivuga, Bola yatanze ubu buhamya mu kiganiro yakoranye na Gen. Freddy Ibingira, cyabereye muri Unity Club i Kigali.