BREAKING NEWS: FARDC Ifashe Ingamba Zidasanzwe mu Rwego rwo Guhangana n’Intambara Ikomeje Gukomera mu Burasirazuba, mu gihe AFC/M23 na MRDP-Twirwaneho Bikomeje Kwagura Ibice Bigenzura
MINEMBWE CAPITAL NEWS
Mu gihe imirwano ikomeje gufata indi ntera mu burasirazuba bwa Repubulika Iharanira Demokarasi ya Congo (RDC), Igisirikare cya Leta (FARDC) cyashyize ahagaragara ubutumwa bwihariye bugenewe abasirikare bari ku rugamba, kibasaba guhagarika cyangwa kugabanya ikoreshwa rya telefoni zigezweho (smartphones) mu bice by’imirwano, kubera impungenge z’uko zishobora gukoreshwa mu kumenya aho baherereye no gushyira ubuzima bwabo mu kaga.
Mu itangazo ryashyizweho umukono ku wa 09/07/2026 n’Umuvugizi w’agateganyo wa FARDC, Lt Col Mongba Hazaray Mak, ubuyobozi bw’igisirikare bwagaragaje ko gukoresha telefoni mu buryo butagenzuwe bishobora gutuma umwanzi amenya aho abasirikare baherereye, bikabangamira umutekano wabo ndetse n’intsinzi y’ibikorwa bya gisirikare.
Iryo tangazo risobanura ko telefoni ifunguye cyangwa ikoreshwa nabi ishobora gutanga amakuru y’aho uyitwaye aherereye (géolocalisation), bikorohereza umwanzi kugaba ibitero cyangwa gukurikirana ibikorwa bya gisirikare.
FARDC yasabye abasirikare bayo kubahiriza amabwiriza akurikira:
- Kwirinda gukoresha telefoni zitemewe ku rugamba;
- Kutajya basangiza abandi amakuru ajyanye n’aho baherereye, ingendo zabo, ubutumwa bahawe cyangwa amashusho y’ibikorwa bya gisirikare ku mbuga nkoranyambaga no mu butumwa bwohererezanya;
- Kubahiriza amabwiriza yose atangwa n’ubuyobozi ku ikoreshwa rya telefoni mu bice by’imirwano;
- Gutanga amakuru yihuse igihe habonetse ikoreshwa riteye amakenga cyangwa isohoka ry’amakuru ashobora gushyira ibikorwa bya gisirikare mu kaga.
Ubuyobozi bwa FARDC bwashimangiye ko “imyitwarire myiza mu kubungabunga amakuru ari intwaro ikomeye yo kurinda ubuzima bw’abasirikare,” busaba buri musirikare gukomeza kuba maso no kubahiriza amabwiriza yatanzwe.
Iri tangazo rije mu gihe amakuru akomeje kugaragaza ko umutekano muri Teritwari ya Fizi, mu Ntara ya Kivu y’Amajyepfo, ukomeje kuba mubi kubera imirwano n’ihindagurika ry’ibice bigenzurwa n’impande zihanganye.
Mu byumweru bishize, ibikorwa bya gisirikare byakomeje kwiyongera mu bice bitandukanye bya Fizi na Minembwe, aho amakuru aturuka mu mpande zitandukanye agaragaza ko MRDP-Twirwaneho, ifatanyije na AFC/M23, ikomeje kwagura ibice igenzura no gukomeza ibikorwa bya gisirikare muri ako karere. Ibi byatumye ikibazo cy’umutekano gikomeza guhangayikisha abaturage, ndetse n’ibikorwa bya gisirikare birushaho gukaza umurego.
Muri uwo murongo, abayobozi bakuru ba AFC/M23 baherutse kugirira uruzinduko i Minembwe. Mu bari bagize urwo ruzinduko harimo:
- Bertrand Bisimwa, Perezida wa M23 akaba na Visi Perezida wa AFC/M23;
- Dr Freddy Kaniki, Perezida wa MRDP-Twirwaneho akaba anungirije Corneille Nangaa mu ihuriro Alliance Fleuve Congo (AFC/M23);
- Lawrence Kanyuku, Umuvugizi wa Alliance Fleuve Congo (AFC/M23) mu bya politiki;
- Nyarugabo Moïse, wabaye Minisitiri muri RDC;
- Abayobozi bakuru ba gisirikare barimo Gen. Byamungu, hamwe n’abandi basirikare bakuru.
Nk’uko AFC/M23 yabitangaje, uru ruzinduko rwari rugamije kuganira n’abaturage, kugirana ibiganiro n’abayobozi bo mu nzego zitandukanye ndetse no gusuzuma uko ibikorwa bimeze mu bice igenzura.
Ku rundi ruhande, ubuyobozi bwa Leta ya RDC bukomeje kuvuga ko buzakomeza gushyira imbaraga mu bikorwa bya gisirikare bigamije kugarura uduce turi mu maboko y’imitwe iyirwanya.
Mu gihe impande zombi zikomeje ibikorwa bya gisirikare, n’itangazamakuru rikaba rikomeje gukurikirana uko ibintu bihagaze ku rugamba, abaturage bo muri Fizi, Minembwe n’ibice bihana imbibi na byo bakomeje guhura n’ibibazo bikomeye by’umutekano ndetse n’ubutabazi, mu gihe intambara ikomeje kugira ingaruka ku buzima bwabo bwa buri munsi.
