Bidasanzwe i Burundi: Madamu Angeline Ndayishimiye Yasabye Audience kwa Perezida Ndayishimiye, Amushyikiriza Ibihembo Bibiri
MINEMBWE CAPITAL NEWS (MCN)
Perezida wa Repubulika y’u Burundi, Évariste Ndayishimiye, yakiriye mu biro bye biherereye mu Ngoro ya Kiriri umufasha we, Madamu Angeline Ndayishimiye, mu rwego rw’ibiganiro byateguwe hakurikijwe uburyo busanzwe bukoreshwa mu kwakira abashyitsi n’abayobozi basura Umukuru w’Igihugu.
Nk’uko byatangajwe n’Ibiro bya Perezidansi y’u Burundi binyuze ku rubuga Ntare Rushatsi, Madamu Angeline Ndayishimiye yari yabanje gusaba audience kwa Perezida wa Repubulika kugira ngo amushyikirize ku mugaragaro ibihembo bibiri mpuzamahanga aherutse guhabwa, bimushimira uruhare yagize mu guteza imbere imibereho myiza n’ubuzima bw’abaturage.
Mu biganiro byabereye mu Ngoro ya Kiriri, Madamu Angeline yashyikirije Perezida Ndayishimiye ibihembo bya United Nations Population Award na Global Health Award, byombi bikaba byaratanzwe mu rwego rwo guha agaciro ibikorwa bye byibanze ku guteza imbere ubuzima bw’abagore, abana n’imiryango, ndetse no gushyigikira gahunda zigamije imibereho myiza y’abaturage.
Perezidansi y’u Burundi yatangaje ko Perezida Ndayishimiye yashimye ibyo bihembo by’icyubahiro umufasha we yegukanye, avuga ko atari ishema rye bwite gusa, ahubwo ari n’ishema ry’u Burundi muri rusange, kuko bigaragaza ko ibikorwa bikorerwa mu gihugu bikomeje kumenyekana no guhabwa agaciro ku rwego mpuzamahanga.
Amafoto n’amashusho byashyizwe ahagaragara n’Ibiro bya Perezidansi y’u Burundi byagaragaje Madamu Angeline yinjira mu biro bya Perezida hakurikijwe uburyo busanzwe bwo kwakira abashyitsi bakuru, mbere yo kumushyikiriza ku mugaragaro ibyo bihembo no kugirana ibiganiro byihariye.
Ibi byakuruye impaka ku mbuga nkoranyambaga, aho bamwe babifashe nk’uburyo bwo kubahiriza amabwiriza ya protocole ya Leta no guha agaciro Ibiro bya Perezidansi, mu gihe abandi babibonye nk’igikorwa kidasanzwe kubera ko cyabaye hagati y’umugabo n’umugore basanzwe babana.
Madamu Angeline Ndayishimiye amaze igihe agaragara mu bikorwa bitandukanye byibanda ku guteza imbere ubuzima rusange, kurengera uburenganzira bw’abagore n’abana, kurwanya ihohoterwa rishingiye ku gitsina, no guteza imbere imibereho myiza y’imiryango. Ibyo bikorwa byatumye agenda ahabwa ishimwe n’ibihembo bitandukanye ku rwego mpuzamahanga.