WALIKALE MU MURONGO W’INTAMBARA: Imirwano YAKOMEYE i Misambo, AFC/M23 Ihanganye na FARDC na Wazalendo — Dore Ibivugwa ku Byavuye ku Rugamba
MINEMBWE CAPITAL NEWS (MCN)
Imirwano ikomeye yongeye kubura mu gace ka Walikale, mu Ntara ya Kivu y’Amajyaruguru, aho kuri uyu wa Gatandatu, tariki ya 08/08/2026, ihuriro Alliance Fleuve Congo (AFC/M23) ryahanganye n’ingabo za FARDC, zifatanyije n’imitwe ya Wazalendo ishyigikiye ubutegetsi bwa Kinshasa.
Iyo mirwano yabereye cyane cyane mu gace ka Misambo, muri Groupement ya Kisimba, nyuma y’uko AFC/M23 baturutse mu gace ka Rusamambu, bakagabwaho ibitero n’ingabo za FARDC zifatanyije n’imitwe ya Wazalendo.
Amakuru aturuka ku baturage no ku masoko yo muri ako gace avuga ko imirwano yatangiye mu gitondo, ikamara amasaha menshi, irangwa n’urusaku rw’imbunda ziremereye n’izoroheje. Iyi mirwano yateje ubwoba mu baturage ba Misambo n’abaturiye inkengero zaho, bamwe batangira guhunga berekeza mu mashyamba.
Mu gihe amakuru ya mbere yavugaga ko Wazalendo bashoboye gusubiza inyuma abo bahanganye, amakuru yukuri aturuka muri ako gace avuga ko AFC/M23 yashoboye gushyira igitutu gikomeye ku ngabo za FARDC n’imitwe yitwaje intwaro izishyigikiye, cyane cyane Wazalendo na FDLR, mu mirwano ikomeje kubera muri aka gace.
Aha, FDLR ivugwa nk’umwe mu mitwe yitwaje intwaro ifatanya n’ingabo za Leta ya RDC ndetse n’imitwe ya Wazalendo mu guhangana na AFC/M23.
Ndetse, amakuru aturuka ku baturage bo muri ako gace avuga ko ibyatangajwe na Wazalendo bitandukanye n’ibyo abaturage babonye ku rugamba, kuko bo bavuga ko AFC/M23 yashoboye gusunika cyane FARDC, Wazalendo na FDLR.
Abaturage bo muri Misambo bavuga ko imirwano yari ikomeye cyane, aho humvikanye urusaku rw’imbunda ziremereye n’izoroheje kuva mu gitondo.
Ubukana bw’imirwano bwatumye abaturage benshi bahangayika, cyane cyane abari batuye hafi y’ibirindiro by’impande zihanganye. Hari impungenge ko imirwano ishobora gukomeza gukwira mu bindi bice biri hafi ya Misambo, cyane cyane mu bice bya Kisimba na Ikobo.
Kugeza igihe iyi nkuru yatangwaga, nta mibare yizewe y’abishwe, abakomeretse cyangwa ibyangiritse ku bikorwa remezo yari yatangazwa.
Iyi mirwano ibaye mu gihe imirwano hagati ya AFC/M23 n’ingabo za FARDC, zifatanyije n’imitwe yitwaje intwaro ikorera ku ruhande rwa Leta, ikomeje gukaza umurego mu bice bitandukanye bya Walikale.
Mu minsi ishize, imirwano yavuzwe no mu bice bya Buleusa, Rusamambu, Bukumbirwa na Kalonge, aho abaturage bagiye bahura n’ihungabana, kwimuka ndetse n’ubwoba bw’uko imirwano yakongera kubasanga.
Ku munsi w’ejo, imirwano yari yanabereye i Rushihe, muri Localité ya Banamulindwa, muri Groupement ya Kisimba, aho AFC/M23 yari ihanganye na Wazalendo. Amakuru yatangajwe icyo gihe yavugaga ko Wazalendo basubijwe inyuma, bituma AFC/M23 ifata ibyo bice.
Imirwano ikomeje muri Kisimba na Ikobo irongera kuzamura impungenge ku mutekano w’abaturage, cyane cyane mu gihe impande zitandukanye zikomeje kugerageza kwagura cyangwa kurinda ibice zigenzura.
Abaturage barasabwa gukomeza kwitonda no kwirinda kwegera ahabera imirwano, mu gihe amakuru arambuye ku mpande zombi ndetse n’ahantu buri ruhande rufite igenzura akomeje gukusanywa.
MINEMBWE CAPITAL NEWS (MCN)
