BREAKING NEWS | IMIRWANO IKOMEYE MU BIPIMO: MRDP-TWIRANEHO IVUGA KO YASUBIJE INYUMA IBITERo BY’IHURIRO RY’INGABO
Imirwano ikomeye yongeye kubura mu Bipimo, hafi ya Kabanju, muri Secteur ya Lulenge, Teritwari ya Fizi, mu Ntara ya Kivu y’Amajyepfo.
Amakuru aturuka ku ruhande rwa MRDP-Twirwaneho avuga ko ibirindiro byayo byagabweho igitero n’ihuriro ry’ingabo ririmo FARDC, ingabo z’u Burundi, Wazalendo na FDLR.
Ubuhamya bwahawe Minembwe Capital News n’umwe mu basirikare ba MRDP-Twirwaneho buvuga ko imirwano yatangiye mu rukerera rwo kuri uyu wa Gatandatu, tariki ya 29/08/2026.
Uyu musirikare yagize ati:
««Audi yaduteye kuva saa kenda kugeza magingo aya, ariko turi kumukubita nabi; yatangiye gusubira inyuma.»»
MRDP-Twirwaneho ivuga ko nyuma y’imirwano ikomeye, yatangiye gusubiza inyuma abawuteye.
IMIRWANO YAKOMEYE MU BIPIMO
Amakuru twakiriye avuga ko imirwano yibanze cyane mu Bipimo, hafi ya Kabanju, ahari ku ntera y’ibilometero hafi bine uvuye kwa Mutoka.
Ibi bibaye mu gihe umutekano muri Teritwari ya Fizi ukomeje kuba mubi, aho imirwano hagati y’impande zitandukanye imaze iminsi yiyongera.
IBITERO BIKOMEJE MU NKENGERO ZA POINT ZERO
Iyi mirwano ibaye nyuma y’ibitero byabaye ku munsi wabanje mu nkengero za Point Zero, aho ihuriro ry’ingabo za RDC ryagabye ibitero ku birindiro bivugwa ko bigenzurwa na MRDP-Twirwaneho.
Ku ruhande rwa MRDP-Twirwaneho, bavuga ko ibyo bitero na byo byasubijwe inyuma, ndetse ko uyu mutwe ukomeje kugenzura Kanguli, kwa Ngurube, kwa Mulima n’ibindi bice bihegereye.
UMUTEKANO MURI FIZI UKOMEJE KUBA MUKE
Kongera gukomera kw’imirwano mu Bipimo, hafi ya Kabanju, no mu nkengero za Point Zero, byongera impungenge ku mutekano w’abaturage bo muri ibyo bice.
Minembwe Capital News irakomeza gukurikirana amakuru mashya ku mirwano iri kubera mu Bipimo, Kabanju, Point Zero, kwa Mulima, kwa Mutoka n’ahandi hakikije ako karere.
Aya makuru aracyakomeza kuvugururwa uko amakuru yizewe agenda aboneka.