Iby’Igitero Cyanyaze Inka z’Abanyamulenge mu Nkengero za Centre ya Minembwe
Abaturage bo mu nkengero za Centre ya Minembwe, mu Ntara ya Kivu y’Amajyepfo, bavuga ko mu ijoro ryo ku wa Kabiri rishyira ku wa Gatatu, tariki ya 02/09/2026, habaye igikorwa cyo kunyaga inka z’Abanyamulenge.
Abatangabuhamya bavuga ko icyo gikorwa cyakozwe n’abasirikare b’u Burundi bafatanyije n’imitwe yitwaje intwaro irimo Wazalendo na FDLR, ndetse n’Imbonerakure.
Amakuru yatanzwe n’abaturage bo muri ako gace avuga ko abo bantu bageze mu bice byegereye Minembwe mu masaha y’ijoro, baturutse mu gice cya Musika, mu Lulenge, banyuze ahitwa Kivumu, mbere yo kugera mu gace ka Ruhemba, aho bivugwa ko banyaze inka.
Banyuze ku Kivumu berekeza muri Ruhemba
Umwe mu batangabuhamya watugejejeho aya makuru yavuze ko abo bantu baturutse i Musika, bakanyura ku Kivumu, mbere yo kugera muri Ruhemba, aho bivugwa ko batwaye inka.
Yagize ati:
«“Zamusika ni ho baturutse. Baraje banyaga inka zari ahitwa muri Ruhemba. Nyuma bamaze kuzinyaga, batangiye kurasa amasasu bayerekeza mu mihana ituwe n’Abanyamulenge.”»
Ubu buhamya buvuga ko nyuma yo kunyaga inka, amasasu yarumvikanye mu gihe abo bantu bari batangiye kuva muri ako gace, ibintu byateje impungenge mu baturage batuye hafi y’aho byabereye.
Abaturage bavuga ko kunyagwa kw’amatungo ari ikibazo gikomeye, kuko inka ari imwe mu nkingi z’ubukungu n’imibereho y’imiryango myinshi yo muri aka gace.
MRDP-Twirwaneho yahise itabara
Amakuru twahawe avuga ko nyuma y’uko amasasu yumvikanye, MRDP-Twirwaneho yahise itabara, ikurikira abo bivugwa ko bari bagizwe n’abasirikare b’u Burundi, Wazalendo na FDLR, bikavugwa ko yabirukanye.
Undi mutangabuhamya yagize ati:
«“Nyuma yo kurasa, MRDP-Twirwaneho yahise itabara irabirukana.”»
Abatangabuhamya bashinja uruhande rw’u Burundi n’imitwe ibifasha
Abaturage batanze aya makuru bavuga ko abari muri icyo gikorwa bari bagizwe n’ingabo z’u Burundi, imitwe ya Wazalendo na FDLR, ndetse n’Imbonerakure.
Umutekano ukomeje kuba ikibazo mu nkengero za Minembwe
Iki gikorwa kivugwa mu gihe umutekano ukomeje kuba ikibazo mu bice bitandukanye bya Teritwari ya Fizi no mu nkengero za Minembwe, ahagiye hagaragara ibikorwa by’ibitero bivugwa ko bikorwa n’ihuriro ry’ingabo za Repubulika Iharanira Demokarasi ya Congo, rigizwe na FARDC, ingabo z’u Burundi hamwe n’imitwe ya Wazalendo na FDLR, ndetse n’abacanshuro baturuka i Burayi no muri Aziya.
Kunyagwa kw’amatungo bishobora kugira ingaruka zikomeye ku baturage, cyane cyane mu duce aho ubworozi bw’inka ari isoko ikomeye y’imibereho. Iyo amatungo anyazwe, imiryango ishobora gutakaza umutungo wayo w’ingenzi, bigakomeza ubukene ndetse n’ubwimuke bw’abaturage.
Abaturage bo muri aka gace basaba ko umutekano wabo n’uw’amatungo yabo ushimangirwa, ndetse ko ibirego byo kunyaga amatungo n’ibindi bikorwa by’ihohoterwa byakurikiranwa, kugira ngo ababigizemo uruhare babiryozwe.
Minembwe Capital News