Isengesho rya Perezida Ndayishimiye Yasabiye Papa Léon XIV Ryateje Ibyo Kwibazwaho: Dore Ubutumwa Yatanze!
Minembwe Capital News (MCN)
Perezida w’u Burundi, Évariste Ndayishimiye, yagaragaje ko ababajwe n’amakuru y’uburwayi bwa Papa Léon XIV, Umushumba wa Kiliziya Gatolika ku Isi, amwifuriza gukira vuba kandi asaba Imana kumurinda no kumuha imbaraga zo guhangana n’ibi bihe bikomeye.
Mu butumwa yashyize ku rubuga nkoranyambaga rwa X, ku wa gatatu tariki ya 14/10/2026, Ndayishimiye yavuze ko yakiriye afite agahinda amakuru y’uko Papa Léon XIV yajyanywe mu bitaro i Roma mu Butaliyani, aho yabazwe.
Yagize ati: “Nakiranye agahinda gakomeye amakuru y’uko Nyirubutungane Papa Léon XIV yajyanywe mu bitaro, aho yabagiwe i Roma, igikorwa kikagenda neza.”
Perezida Ndayishimiye yakomeje agaragaza ko yifatanyije na Papa muri ibi bihe by’uburwayi, abikora mu izina ry’Abarundi no mu rye bwite. Yanamusabiye ku Mana, asaba ko yakira vuba kandi agakira burundu.
Ati: “Mu izina ry’Abarundi no mu ryanjye bwite, ndamugaragariza ko twifatanyije na we muri ibi bihe. Turasaba Imana kumukiza vuba kandi agakira burundu. Imana imurinde kandi imuhe imbaraga.”
Ubutumwa bwa Perezida Ndayishimiye bwakomeje kuvugisha benshi ku mbuga nkoranyambaga, aho abantu bagaragaje ibitekerezo bitandukanye ku isengesho rye no ku butumwa bwo kwifuriza Papa Léon XIV gukira vuba.
Uko ubuzima bwa Papa Léon XIV buhagaze
Amakuru yatangajwe mu nkuru avuga ko Papa Léon XIV, ufite imyaka 71, yasanganywe kanseri y’igihaha yo mu bwoko bwa adenocarcinoma, nyuma yo kubagwa ku wa Kabiri, tariki ya 13/10/2026.
Yabagiwe mu Bitaro bya Gemelli biherereye i Roma mu Butaliyani. Abaganga bamukuyeho igice cyo hasi cy’igihaha cy’iburyo cyari cyarafashwe n’uburwayi.
Vatican yatangaje ko kubaga byagenze neza kandi ko nta bibazo byavutse mu gihe cy’igikorwa. Nyuma yo kubagwa, Papa yasubijwe mu cyumba cye kugira ngo akomeze kwitabwaho n’abaganga.
Igikorwa cyo kubaga ubwacyo cyamaze iminota igera kuri 90, nubwo Papa yamaze hafi amasaha atatu mu cyumba cyo kubagirirwamo.
Abaganga bari bagamije gukuraho igice cyose cyari cyarafashwe n’uburwayi, kugira ngo bagabanye ibyago byo gusigarana uturemangingo twa kanseri.
Icyakora, kuba igikorwa cyo kubaga cyagenze neza ntibihita bivuga ko Papa yakize kanseri burundu. Amakuru yatangajwe avuga ko abaganga bari bagitegereje ibisubizo by’ibindi bizamini bizagaragaza niba kanseri yarakwirakwiriye mu bindi bice by’umubiri, ndetse n’ubuvuzi azakenera nyuma yo kubagwa.
Icyemezo ku buvuzi buzakurikiraho kizashingira ku isuzuma ry’abaganga no ku bisubizo by’ibizamini bizakorwa.
Minembwe Capital News (MCN)