Nyuma y’Urugendo rwa Tshisekedi muri Israel, Kinshasa Yiteguye Iki? Umubano w’Ibihugu Byombi Ugiye Gufata Indi Ntera
Minembwe Capital News (MCN)
Umubano wa dipolomasi hagati ya Israel na Repubulika Iharanira Demokarasi ya Congo (RDC) urimo gukomera nyuma y’uruzinduko Perezida Félix-Antoine Tshisekedi yagiriye i Yeruzalemu mu kwezi kwa Cyenda 2026. Israel irateganya kohereza ambasaderi mushya i Kinshasa, mu rwego rwo kwagura ubufatanye mu mutekano, iperereza, ikoranabuhanga n’ishoramari.
Nk’uko ikinyamakuru Africa Intelligence cyabitangaje, Israel irimo gutegura gushyira ambasaderi wayo mushya muri RDC mu mirimo. Iyi gahunda ikurikiye ibiganiro byahuje abayobozi bakuru b’ibihugu byombi bigamije kunoza imikoranire ya dipolomasi.
Ku itariki ya 01/09/2026, Perezida Tshisekedi yagiriye uruzinduko rw’akazi i Yeruzalemu, aho yahuye na Minisitiri w’Intebe wa Israel, Benjamin Netanyahu, na Perezida Isaac Herzog. Nk’uko ibiro bya Perezida wa RDC byabitangaje, ibiganiro byibanze ku bufatanye mu nzego zirimo umutekano, ubwirinzi, ubuhinzi, ibikorwa remezo, ingufu n’ikoranabuhanga.
Iyi ntambwe yakurikiye uruzinduko Perezida Isaac Herzog yagiriye i Kinshasa mu kwezi kwa cumi na kabiri 2025, rugamije gushimangira umubano w’ibihugu byombi.
Mu rwego rw’umutekano, Africa Intelligence ivuga ko RDC ishaka gukorana na Israel mu by’iperereza, umutekano wo mu ikoranabuhanga no kurinda Perezida wa Repubulika. Ubu bufatanye bushobora gufasha RDC kunoza uburyo bwo gukumira ibyago by’umutekano, binyuze mu kungurana ubumenyi n’ubunararibonye.
Ku itariki ya 02/10/2026, ikigo cya Leta ya Congo gishinzwe itangazamakuru, ACP, cyatangaje ko habaye ibiganiro bya tekiniki bigamije gutegura ingendo z’abashoramari n’abacuruzi bo muri Israel na RDC. Ibiganiro byibanze ku gushaka amahirwe y’ubucuruzi, gukurura ishoramari no guteza imbere ibicuruzwa bikorerwa muri RDC.
Kohereza ambasaderi mushya no gushyiraho ambasade ihoraho ya Israel i Kinshasa bishobora koroshya imikoranire no kwihutisha ishyirwa mu bikorwa ry’imigambi ihuriweho.
Minembwe Capital News (MCN)