Masisi: FRN Yasubije Inyuma Ibitero Byayigabweho
Minembwe Capital News (MCN)
Imirwano yahuje umutwe wa Front pour la Refondation de la Nation (FRN) n’ihuriro ry’ingabo za Repubulika Iharanira Demokarasi ya Congo (RDC), rigizwe n’ingabo za FARDC, Wazalendo n’abandi bafatanyabikorwa bazo, ikomeje kugira ingaruka ku buzima bw’abaturage, by’umwihariko ku burezi mu gace ka Masisi, muri Kivu ya Ruguru.
Nk’uko amakuru aturuka muri ibyo bice abivuga, kuri uyu wa Gatatu, tariki ya 21/10/2026, imirwano yahuje FRN n’ingabo za FARDC zifatanyije n’abo bafatanyabikorwa, barimo Wazalendo, yatumye Ishuri Ribanza rya Runambi ryimurirwa i Kibarizo, muri teritwari ya Masisi.
Amakuru MCN yakuye mu masoko yo muri ako gace agaragaza ko iryo shuri ryakomeje guhura n’imbogamizi mu gusubukura amasomo uko bisanzwe. Ibyo biterwa n’ibibazo by’umutekano byatewe n’imirwano yakunze kubera muri ako gace.
Ku bijyanye n’imirwano, amakuru yatangajwe n’uruhande rwa FRN agaragaza ko uwo mutwe wasubije inyuma ibitero wavuze ko wagabweho n’ihuriro ry’ingabo za FARDC, Wazalendo, abarwanyi ba FDLR n’abacanshuro bafatanya na zo.
Umuyobozi w’Ishuri rya Runambi, Célestin Bagira, yavuze ko kwimura iryo shuri byakomye mu nkokora imikorere yaryo. Abanyeshuri n’abarimu bahura n’ibibazo birimo kubura intebe zo kwicaraho n’ibikoresho by’ishuri bikenewe kugira ngo amasomo akomeze mu buryo busanzwe.
Ibi bigaragaza ko imirwano yo muri Masisi ikomeje kugira ingaruka ku baturage, cyane cyane ku bana bafite uburenganzira bwo kwiga mu mutekano no mu bihe bibafasha kubona ireme ry’uburezi.
Kugeza ubu, amakuru yatanzwe n’uruhande rwa FRN agaragaza ko uwo mutwe wagaruye ituze nyuma yo gusubiza inyuma ibitero wavuze ko wagabweho. Icyakora, Ishuri Ribanza rya Runambi ryari ryamaze kwimurirwa i Kibarizo kubera ibibazo by’umutekano byaribimaze igihe muri ako gace.
Minembwe Capital News (MCN)