FRN i Bukavu: Nangaa na Bisimwa Basobanuye Icyerekezo cya Politiki n’Intego zo Kongera Kubaka Congo
Minembwe Capital News (MCN)
Corneille Nangaa Yobeluo na Bertrand Bisimwa, bungirije Joseph Kabila, umuyobozi mukuru wa Front pour la Refondation de la Nation (FRN), bahuriye i Bukavu n’abayobozi batandukanye b’uyu mutwe, baganira ku cyerekezo cya politiki, ingamba n’umugambi wo kongera kubaka Repubulika Iharanira Demokarasi ya Congo (RDC).
Iyi nama yari igamije gushimangira ubumwe mu nzego za FRN, kunoza imikoranire no gusobanura uruhare rwa buri muyobozi mu gushyira mu bikorwa gahunda z’uyu mutwe. Marcelin Cishambo, wahoze ari Guverineri wa Kivu y’Amajyepfo, na we yari yitabiriye iyi nama.
Intego nyamukuru ya FRN
FRN ivuga ko iharanira impinduka mu miyoborere ya RDC, igamije gukuraho ubutegetsi bwa Kinshasa ibona bw’igitugu, hagashyirwaho ubundi butegetsi bwiza burengera inyungu z’abaturage kandi bwubaha uburenganzira bwabo.
Icyerekezo cyayo ni ukubaka igihugu kirangwa n’imiyoborere myiza, ubutabera n’amahoro, aho Abanyekongo bose bazagira ubwisanzure bwo kwishyira bakizana, bagatanga ibitekerezo kandi bakagira uruhare mu kugena ahazaza h’igihugu cyabo.
Ubutumwa ku Banyekongo bakiri hanze y’igihugu
FRN yanatanze ubutumwa busaba Abanyekongo bakiri hanze y’igihugu gutekereza ku gutaha, kugira ngo na bo bagire uruhare mu rugendo rwo kongera kubaka igihugu cyabo.
Ubutumwa bwatanzwe buragira buti: “Igihe kirageze ngo abandi Banyekongo bakiri hanze na bo bakurikize urugero, basubire mu gihugu cyabo.”
Iyi nama igaragaza ubushake bwa FRN bwo gukomeza gushyira imbere icyerekezo cyayo cya politiki no guharanira impinduka mu miyoborere ya Repubulika Iharanira Demokarasi ya Congo.
Minembwe Capital News (MCN)