Minembwe: Imirwano Yongeye Kubura mu Rugezi, Ibitero Byibasiye Ku Wihene na Nyakirango

Minembwe Capital News (MCN)

Mu rukerera rwo kuri iki Cyumweru, tariki ya 25/10/2026, imirwano yongeye kubura mu gace ka Rugezi, mu majyepfo ya Centre ya Minembwe, mu Ntara ya Kivu y’Amajyepfo, mu burasirazuba bwa Repubulika Iharanira Demokarasi ya Congo (RDC).

Amakuru Minembwe Capital News (MCN) yamenye, ishingiye ku buhamya bw’umwe mu bantu bari muri ako gace, avuga ko ihuriro ry’ingabo zirimo iza FARDC, iz’u Burundi, imitwe ya Wazalendo na FDLR, hamwe n’abacanshuro bivugwa ko baturutse i Burayi no muri Aziya, ryagabye ibitero ku bice bitandukanye byo muri Rugezi.

Ku Wihene na Nyakirango ni ho hibasiwe n’ibitero

Uwo MCN yavuganye na we yavuze ko ibitero byibasiye cyane uduce twa Ku Wihene na Nyakirango, ndetse n’utundi duce twegereye aho. Yongeyeho ko ibitero by’ingabo za FARDC n’abo bafatanyije byaturutse mu gace ka Gasiro.

Uwo mutangabuhamya yasobanuye ko imirwano yakomeje guhuza ingabo za FARDC n’abo bafatanyije, ku ruhande rumwe, n’ingabo za FRN ku rundi ruhande.

Yagize ati: “Rugezi ubu duhanganye na FARDC n’abambari bayo. Bateye Ku Wihene na Nyakirango no mu tundi duce duherereye hafi aho.”

Amakuru yatanzwe n’uwo mutangabuhamya avuga kandi ko, nubwo ingabo za FRN ari zo zagabweho ibitero, zakomeje guhangana n’ingabo zari zizigabyeho. Yongeyeho ko izo ngabo zagabye ibitero zatangiye gusubira inyuma.

Icyakora, aya makuru ashingiye ku buhamya bw’umuntu uri muri ako gace, kandi MCN ntirabona ubundi buhamya bwigenga bwemeza uko imirwano yarangiye cyangwa uko impande zombi zihagaze.

Ibitero bikurikiye ibyabaye ku wa 24/10/2026

Iyi mirwano ibaye nyuma y’ibindi bitero byagabwe ku bice bituwe ku wa Gatandatu, tariki ya 24/10/2026, nk’uko byatangajwe na Col. Rugabo Fidel mu nyandiko yashyize ku rubuga nkoranyambaga rwa X.

Minembwe Capital News (MCN)