RDC: Ingabo za FRN Zafashe Gipimo no kwa Nzohaha, Imirwano Irakomeje
Minembwe Capital News (MCN)
Ingabo z’Ihuriro rya Front pour la Refondation de la Nation (FRN), riyobowe na Joseph Kabila, zatangaje ko zafashe agace ka Gipimo no kwa Nzohaha, mu gihe imirwano hagati yazo n’ihuriro ry’ingabo zirwanirira ubutegetsi bwa Repubulika Iharanira Demokarasi ya Congo (RDC) ikomeje gukaza umurego.
Amakuru MCN yahawe n’umwe mu basirikare bakuru ba FRN bari muri ibyo bice avuga ko ingabo z’iri huriro zakomeje guhangana n’ingabo za Leta ya RDC n’imitwe bafatanyije.
Uyu musirikare yavuze ko ahagana saa Munani z’amanywa, ku isaha ikoreshwa mu bice bya Minembwe na Bukavu, ingabo za FRN zari zimaze gufata Gipimo no kwa Nzohaha, ariko ko imirwano yari igikomeje.
Yagize ati: “Tumaze gufata aka kanya, saa Munani ku masaha yo mu Minembwe na Bukavu, ku Gipimo no kwa Nzohaha, ariko turacyari kwirukana FARDC n’abambari bayo. Dushobora no kubakura mu bindi bice.”
Uyu musirikare kandi yavuze ko imirwano yatangiye mu rukerera rwo kuri uyu wa Mbere, tariki ya 26/10/2026.
Ingabo zihanganye muri iyi mirwano
Amakuru yatanzwe n’uyu musirikare avuga ko FRN ihanganye n’ihuriro rigizwe n’ingabo za FARDC, iz’u Burundi, imitwe ya Wazalendo na FDLR, ndetse n’abacanshuro bakomoka mu Burayi no muri Aziya.
Imirwano ibaye nyuma y’ibitero byabereye mu bindi bice
Iyi mirwano ibaye nyuma y’imirwano ikomeye yavuzwe ku Cyumweru, tariki ya 25/10/2026, mu bice byo ku Wihene, Nyarurango no mu Rugomero. Indi mirwano ikomeye kandi yabereye ku Gipimo.
Amakuru yatanzwe avuga ko mu mirwano yo ku Cyumweru, ingabo za FARDC zakoresheje indege zitagira abapilote, zizwi nka drones, ndetse n’indege z’intambara zo mu bwoko bwa Sukhoi.
Ku rundi ruhande, FRN ivuga ko yigaruriye ibice byo ku Wihene, Nyarurango no mu Rugomero.
Minembwe Capital News (MCN)