Amashusho Yagaragaje Imirambo Myinshi y’Abasirikare ba FARDC Baguye mu Rubuga
MINEMBWE CAPITAL NEWS (MCN)
Hagaragaye amashusho agaragaza imirambo myinshi y’abasirikare b’Igisirikare cya Repubulika Iharanira Demokarasi ya Congo (FARDC), aho bamwe muri bagenzi babo bagaragaraga barira kandi bababajwe n’urupfu rwabo.
Muri ayo mashusho, abasirikare babiri bahindagura imirambo ya bagenzi babo barira. Mu majwi yumvikana, bavuga ko bishwe na drone, ariko ntibagaragaza uruhande rwayikoresheje.
Imirambo igaragara ni myinshi, imwe muri yo itondetse mu mirongo. Amashusho agaragaza ko bamwe baguye mu kambi yabo, abandi bagwa mu gace kari munsi yayo ubwo Barimo bahunga.
Andi makuru Minembwe Capital News (MCN) yamenye avuga ko abo basirikare baguye mu mirwano yabereye mu Rubuga, mu gace ka Kigoma, muri Teritwari ya Uvira, mu Ntara ya Kivu y’Amajyepfo. Iyo mirwano yabaye ku wa Kabiri w’iki cyumweru turimo.
Bivugwa ko yahuje abasirikare ba Front pour la Refondation de la Nation (FRN) n’ihuriro ry’ingabo zishyigikiye ubutegetsi bwa Repubulika Iharanira Demokarasi ya Congo, ririmo FARDC, ingabo z’u Burundi, imitwe ya Wazalendo na FDLR, ndetse n’abacanshuro bivugwa ko bakomoka mu Burayi no muri Aziya.
Nk’uko amashusho abigaragaza, igice kinini cy’abo basirikare cyaguye mu kambi iherereye mu Rubuga, mu gihe abandi baguye munsi yayo, aho bivugwa ko bari bahungiye.
Kugeza ubu, ayo mashusho ntaremeza umubare nyawo w’abasirikare bahitanywe n’imirwano, uruhande rwakoresheje drone cyangwa uko ibitero byagenze mu buryo burambuye.
MINEMBWE CAPITAL NEWS (MCN)