C64 mu Bubiligi: Maxime Prévot Yavuze Impamvu Itunguranye Yatumye Atakira Intumwa Zayo
Minembwe Capital News (MCN)
Minisitiri w’Ububanyi n’Amahanga w’u Bubiligi, Maxime Prévot, yahakanye amakuru yavugaga ko yanze kwakira intumwa z’abatavuga rumwe n’ubutegetsi bwa Repubulika Iharanira Demokarasi ya Congo (RDC), ziri mu ihuriro rya C64, zari mu ruzinduko i Bruxelles.
Mu minsi ishize, by’umwihariko kuva ku wa Kane, ku mbuga nkoranyambaga zo muri Congo hakwirakwijwe amakuru n’ibirego bivuga ko Maxime Prévot yanze guhura n’izo ntumwa zari zagiye i Bruxelles gushaka ubufasha n’ubuhuza ku bibazo bya politiki byugarije igihugu cyabo.
Mu kiganiro yagiranye n’igitangazamakuru Deutsche Welle (DW), Maxime Prévot yasobanuye ko kutabasha kwakira izo ntumwa bitatewe no kutaziha agaciro cyangwa gushaka kuzisuzugura. Yagize ati: “Ntabwo nanze kwakira intumwa za C64, ahubwo nabuze umwanya kuko nari mpugiye mu bindi bikorwa.”
Uyu muyobozi yongeye gushimangira ko ashyigikiye ko muri Repubulika Iharanira Demokarasi ya Congo habaho ibiganiro by’igihugu byitabirwa n’impande zose, hagamijwe gushakira hamwe umuti urambye w’ibibazo byugarije icyo gihugu.
Ku bijyanye n’impamvu atabashije guhura n’intumwa za C64, Maxime Prévot yavuze ko icyo gihe yari ahugiye mu biganiro by’abagize Guverinoma y’u Bubiligi byari bigamije kuganira ku ngingo ijyanye n’ingengo y’imari ya Leta.
Ibi bisobanuro yabitanze nyuma y’uko hari hamaze gukwirakwira amakuru yavugaga ko umukuru wa dipolomasi y’u Bubiligi yanze kwakira intumwa z’abatavuga rumwe n’ubutegetsi bwa Kinshasa.
Yashimangiye ko kutabasha guhura na zo bitatewe n’umugambi wo kuzisuzugura, ahubwo byatewe n’izindi nshingano za Leta yari afite muri icyo gihe.
Minembwe Capital News (MCN)