Minisitiri Nduhungirehe Akoze ku Mutima wa Kinshasa: Ibyo u Rwanda Ruteze kuri RDC ku Kibazo cya FDLR Birakomeye
Minembwe Capital News (MCN)
Minisitiri w’Ububanyi n’Amahanga w’u Rwanda, Olivier Nduhungirehe, yanenze imvugo ya Guverinoma ya Repubulika Iharanira Demokarasi ya Congo (RDC) ku bijyanye no kurandura umutwe wa FDLR, agaragaza ko igihe kigeze ngo Kinshasa ireke gukomeza kuvuga ibyo izakora mu gihe kizaza, ahubwo itangaze ibikorwa bifatika yamaze gukora mu kubahiriza ibyo yiyemeje.
Ibi Minisitiri Nduhungirehe yabitangaje asubiza amagambo ya mugenzi we wa RDC, Thérèse Kayikwamba Wagner, wavuze ko igihugu cye kizubahiriza inshingano cyiyemeje mu masezerano ya Washington, zirimo gufata ingamba zo kurandura FDLR.
Mu kiganiro yagiranye n’igitangazamakuru AFP, Kayikwamba Wagner yavuze ko ibikorwa bya Kinshasa byo kubahiriza ibyo yemeye mu nzira z’amahoro bigenda bitanga umusaruro. Yongeyeho ko RDC ishaka kurangiza ibyo yise impamvu u Rwanda rumaze imyaka irenga 30 rushingiraho rugaragaza ko FDLR ari ikibazo kibangamiye umutekano warwo.
Aya magambo yayavugiye i Moscow mu Burusiya, aho yashimangiye ko igihugu cye gifite ubushake bwo gukemura burundu ikibazo cya FDLR no gukuraho ibyo yise imvugo u Rwanda rwakomeje gukoresha rushingiye kuri uwo mutwe.
Mu kumusubiza, Nduhungirehe yibanze ku mvugo mugenzi we yakoresheje, agaragaza ko RDC izubahiriza inshingano zayo ndetse ko ishaka kurandura FDLR, aho kugaragaza ibikorwa yamaze gukora.
Yagize ati: “RDC ‘izubahiriza’ inshingano zayo… RDC ‘ishaka’ kurandura FDLR…”
Yakomeje agaragaza ko, ku bijyanye no gushyira mu bikorwa inshingano za politiki n’iz’umutekano impande zombi zemeranyijeho mu masezerano amaze amezi arenga 16 ashyizweho umukono, byari bikwiye gukoresha amagambo agaragaza ibimaze gukorwa cyangwa ibiri gukorwa, aho gukomeza kuvuga ibizakorwa mu gihe kizaza.
Ubu butumwa bwa Nduhungirehe bwagaragazaga ko Kigali ishaka kubona ibikorwa bifatika bya Kinshasa mu kurandura FDLR, aho gukomeza kumva amasezerano n’isezerano ry’uko ibyo bikorwa bizashyirwa mu bikorwa.
FDLR ni umutwe witwaje intwaro washinzwe n’abahoze mu nzego za politiki n’igisirikare z’u Rwanda nyuma ya Jenoside yakorewe Abatutsi mu 1994. U Rwanda rufata uyu mutwe nk’ikibazo gikomeye cy’umutekano warwo, rukaba rumaze igihe rusaba ko urandurwa burundu.
Mu masezerano ya Washington yashyizweho umukono ku itariki ya 27/06/2025, RDC yemeye gufata ingamba zo kurandura FDLR, mu gihe u Rwanda na rwo rwiyemeje gushyira mu bikorwa gahunda yo gukuraho ingamba zarwo z’ubwirinzi, hakurikijwe uburyo n’igihe biteganywa n’ayo masezerano.
Ku ruhande rwa Kinshasa, Kayikwamba Wagner yavuze ko hari intambwe imaze guterwa mu kubahiriza ibyo RDC yemeye, anashinja Kigali gukomeza kwihisha inyuma y’ikibazo cya FDLR, mu gihe na yo itubahiriza ibyo yiyemeje.
Ibi bigaragaza ko, nubwo impande zombi zashyize umukono ku masezerano agamije kugarura amahoro n’umutekano mu burasirazuba bwa RDC, hakomeje kubaho kutumvikana ku rwego buri ruhande rumaze gushyira mu bikorwa inshingano zarwo.
Ikibazo gikomeye gisigaye ni ukumenya niba Kinshasa izagaragaza ibikorwa bifatika mu kurandura FDLR, ndetse niba n’u Rwanda na rwo ruzashyira mu bikorwa ibyo rwiyemeje, kugira ngo amasezerano ya Washington atarangirira ku magambo gusa, ahubwo azane impinduka zifatika mu mutekano w’ibihugu byombi no mu karere k’Ibiyaga Bigari.
Minembwe Capital News (MCN)