Mu Kibaya cya Rusizi: Amasasu Yumvikanye Mu Ijoro Yateje Impaka, MCN Yashyize Ukuri Ahagaragara
Minembwe Capital News (MCN)
Amakuru yavugaga ko habereye imirwano mu Kibaya cya Rusizi, muri Teritwari ya Uvira, mu Ntara ya Kivu y’Amajyepfo, mu ijoro ryaraye rikeye rishyira kuri iki Cyumweru, ntabwo ahura n’ibyo amasoko ya Minembwe Capital News yamenye. Amakuru MCN ifite agaragaza ko nta mirwano yahabereye, ahubwo habayeho kurasana kwatewe n’ubwoba bwari bwatashye abasirikare ba FARDC, ingabo z’u Burundi na Wazalendo, nyuma yo gukeka ko hari abasirikare b’ihuriro rya FRN begereye ibice bari barimo.
Nk’uko ubuhamya bwagejejwe kuri Minembwe Capital News bubivuga, hafi ya Katogota, abarwanyi ba Wazalendo bakekaga ko abantu bari bavuye gusura imyaka yabo ari abasirikare ba FRN, bahita batangira kurasa amasasu mu gihe kingana n’iminota 25.
Iryo rasana ryabaye ahagana saa yine z’ijoro, ku isaha ikoreshwa mu Minembwe no mu mujyi wa Bukavu.
Amasoko ya MCN agaragaza ko amasasu yarashwe n’abo ku ruhande rwa Leta ya Kinshasa bitewe n’ubwoba no kwikanga, aho kuba imirwano yahuje impande zihanganye, nk’uko amakuru yakomeje gukwirakwizwa ku mbuga nkoranyambaga yabivugaga.
Ahandi humvikanye amasasu ni ku misozi yegereye agace ka Luvungi. Na ho, amakuru MCN ifite agaragaza ko abasirikare n’abo bafatanyije ku ruhande rwa Leta barashe amasasu nyuma yo kwikanga, mu ijoro ryaraye rikeye. Icyakora, MCN nta gihamya ifite yemeza ko muri ako gace habereye imirwano yahuje impande zombi.
Ubwoba bwo kwigarurirwa kw’ibice bya Rusizi na Uvira
Nubwo nta mirwano yabaye mu Kibaya cya Rusizi, mu bice bigenzurwa n’ihuriro ry’ingabo za Repubulika Iharanira Demokarasi ya Congo hakomeje kugaragara umwuka w’ubwoba n’impungenge z’umutekano.
Amakuru agera kuri MCN agaragaza ko ku ruhande rwa Leta ya Kinshasa hari impungenge z’uko ihuriro rya FRN rishobora kwigarurira ibice by’ingenzi byo mu Kibaya cya Rusizi, ndetse rikagera no mu mujyi wa Uvira.
No muri Uvira ubwaho, amakuru akomeje kuvugwa agaragaza ubwoba bw’uko FRN ishobora kuhagera mu gihe kiri imbere, bigatuma umwuka w’intambara ukomeza gufata indi ntera.
Ubu bwoba ntibugarukira gusa mu basirikare, kuko n’abaturage batangiye kugira impungenge ku mutekano wabo. Amakuru avuga ko hari benshi batangiye guhunga, bamwe berekeza i Kalemie, abandi bajya i Bujumbura mu Burundi, mu gihe abandi bafata umuhanda werekeza muri Teritwari ya Fizi.
Bityo, nubwo amasasu yumvikanye hafi ya Katogota no ku misozi yegereye Luvungi yakuruye impungenge, ni ngombwa gutandukanya irasana ryatewe no kwikanga n’imirwano nyirizina. Kugeza ubu, amakuru MCN yakusanyije agaragaza ko nta mirwano yabaye mu Kibaya cya Rusizi muri iryo joro.
Amakuru ku bwoba bwateye ingabo za Leta no ku mpungenge zo kwigarurirwa kwa Uvira n’ibice byo mu Kibaya cya Rusizi ashingiye ku masoko ya Minembwe Capital News.
Minembwe Capital News (MCN)