Ingingo ya 217 Yateje Impaka: Sesanga Yashinje Tshisekedi Kugoreka Itegeko Nshinga!
Minembwe Capital News (MCN)
Umunyapolitiki utavuga rumwe n’ubutegetsi bwa Repubulika Iharanira Demokarasi ya Congo (RDC), Delly Sesanga, yanenze Perezida Félix Antoine Tshisekedi, amushinja kugoreka ibisobanuro by’Ingingo ya 217 y’Itegeko Nshinga ry’icyo gihugu.
Delly Sesanga, uyobora ishyaka rya politiki Envol akaba yaranigeze kwiyamamariza kuyobora igihugu, yagaragaje ibyo kunenga mu itangazo yashyize ahagaragara ku Cyumweru. Muri iryo tangazo, yashinje ubutegetsi bwa Perezida Tshisekedi guha ibisobanuro bidakwiye ibikubiye mu Ngingo ya 217 y’Itegeko Nshinga rya RDC.
Iyo ngingo iteganya ko RDC ishobora kugirana n’ibindi bihugu amasezerano cyangwa amasezerano mpuzamahanga ateganya ihererekanya ry’imwe mu bubasha bw’igihugu, hagamijwe guteza imbere ubumwe bw’ibihugu bya Afurika.
Iyi ngingo iri mu bigize impaka zijyanye n’ubusugire bw’igihugu, cyane cyane ku bijyanye n’uburyo RDC ishobora kwitabira amasezerano y’ubufatanye n’ibindi bihugu byo ku mugabane wa Afurika.
Ku bwa Delly Sesanga, ibisobanuro ubutegetsi buriho buha iyo ngingo bishobora gutuma hafatwa ibyemezo cyangwa hagakorwa ibikorwa birenga imbibi z’ibyo Itegeko Nshinga ryemera, bikaba byagira ingaruka ku busugire bw’igihugu.
Sesanga agaragaza impungenge z’uko uburyo ubutegetsi bwa Perezida Tshisekedi busobanuramo iyo ngingo bushobora gufungura amarembo ku bikorwa byagira ingaruka zikomeye ku bwigenge bwa RDC no ku budahangarwa bw’ubutaka bwayo.
Minembwe Capital News (MCN)