Uvira: Imyigaragambyo Yari Yitezweho Abantu Benshi Yitabiriwe na Bake, Abaturage Bagaragaza Ibyo Bifuriza FRN
Minembwe Capital News (MCN)
Imyigaragambyo yabereye mu mujyi wa Uvira, mu Ntara ya Kivu y’Amajyepfo, yatangiriye kuri Rond-point, ikomereza mu bindi bice bitandukanye by’umujyi, mbere y’uko abayitabiriye berekeza ku biro by’inzego za Leta, aho bagejeje ubutumwa bwabo.
Amakuru yizewe Minembwe Capital News (MCN) yahawe n’abaturage batuye muri uwo mujyi, bamwe muri bo bakaba baranagize uruhare muri iyo myigaragambyo, agaragaza ko yateguwe n’ubuyobozi bw’Intara ya Kivu y’Amajyepfo, ariko ikitabirwa n’abantu bake ugereranyije n’uko byari byitezwe.
Umwe mu batanze ubuhamya yabwiye MCN ati: “Imyigaragambyo yabaye, ariko yitabiriwe n’abantu bake cyane ugereranyije n’uko byari byitezwe. Abayitabiriye bari bambaye imyenda iriho amashusho ya Dynamique Gisaro.”
Yakomeje avuga ko muri iyo myigaragambyo nta bikorwa byo kwangiza ibintu byabaye.
Mu bundi buhamya MCN yahawe, undi muturage yasobanuye ko kuba nta bikorwa byo kwangiza ibintu byabaye bishobora kuba bifitanye isano n’uko imyigaragambyo yari yateguwe n’ubuyobozi, bityo abayitabiriye bakaba baririnze ibikorwa bishobora guteza umutekano muke cyangwa kwangiza ibikorwa remezo.
Uyu muturage yavuze kandi ko hari abaturage batishimiye ibikorwa by’ubutegetsi bwa Perezida Félix Tshisekedi, ndetse ko bamwe muri bo bagaragaza ko biteguye kwakira ihuriro rya Front pour la Refondation de la Nation (FRN).
Yagize ati: “Abaturage bo muri Uvira bategereje FRN. Ntibagishaka Wazalendo, FDLR na FARDC, kuko babashinja ibikorwa byo gusahura abaturage mu ngo zabo.”
Ibyo birego byerekeye ibikorwa byo gusahura abaturage bivugwamo kandi abasirikare b’u Burundi, bivugwa ko basanzwe bakorana bya hafi n’ingabo za FARDC mu bikorwa bya gisirikare byo mu burasirazuba bwa Repubulika Iharanira Demokarasi ya Congo.
Minembwe Capital News (MCN)