Kabare Yageneye MPA na Gakondo Ubutumwa Bukomeye, Byinshi kuri Ubu Butumwa
Minembwe Capital News (MCN)
Umusesenguzi Girinka Kabare William yagaragaje ko kubura ibikorwa remezo, cyane cyane umuhanda, biri mu bibazo bikomeye byakomeje gutuma akarere k’imisozi miremire ya Fizi, Mwenga na Uvira (Hauts-Plateaux), mu ntara ya Kivu y’Amajyepfo, kaguma mu bwigunge, mu bukene no mu ngaruka z’intambara. Yasabye Mahoro Peace Association (MPA) na Gakondo (Mutualité y’Abanyamulenge ku Isi) gushyira imbaraga mu gushaka inkunga n’ubuvugizi bigamije kubaka umuhanda uhuza Bukavu, Nyangezi, Kaziba, Rurambo na Hauts-Plateaux ukagera i Nganji, awita “Agaciro Kacu”.
Mu butumwa yanyujije kuri Minembwe Capital News (MCN), akabugenera Mahoro Peace Association (MPA) na Gakondo, umusesenguzi Girinka Kabare William yagaragaje ko ikibazo cy’ubwigunge bw’akarere k’imisozi miremire ya Fizi, Mwenga na Uvira, kazwi nka Hauts-Plateaux, gifite imizi mu mateka maremare arimo ivangura, kutitabwaho mu bikorwa by’iterambere n’intambara zimaze imyaka myinshi muri ako karere.
Yasobanuye ko ako karere gafite amateka yihariye, aho Abanyamulenge (Abatutsi) ari bo avuga ko bahatuye mbere, nyuma hakaza n’abandi baturage. Yagaragaje ko, nubwo ako karere kari gakize ku bworozi bw’inka n’intama, abaturage bako bakomeje kubura ibikorwa remezo by’ibanze byari kubafasha kwiteza imbere.
Imyaka isaga 66 y’ubwigunge n’ibikorwa remezo bike
Girinka Kabare William avuga ko kuva kuri Leta za Joseph Kasavubu, Mobutu Sese Seko, Laurent-Désiré Kabila, Joseph Kabila kugeza kuri Leta ya Félix Tshisekedi, nta muyobozi n’umwe wigeze ashyira imbere mu buryo bugaragara ibikorwa remezo by’ingenzi muri aka karere.
Mu isesengura rye, avuga ko kuba ako karere gatuwe ahanini n’Abanyamulenge, bafatwaga nk’abanyamahanga mu gihugu cyabo, byagize uruhare mu kugashyira mu bwigunge no gutuma abaturage bako batabona amahirwe angana n’ay’abandi.
Yagaragaje ko kuva mu gihe cy’ubukoroni kugeza ubu, abaturage bo muri Hauts-Plateaux bakomeje guhura n’ingorane zikomeye mu bijyanye n’ingendo, ubuvuzi, uburezi n’iterambere ry’imibereho yabo.
Yatanze urugero rw’uko kugera ku muhanda wa kaburimbo byashoboraga gusaba umuntu gukora urugendo rw’iminsi itatu. Ibyo byatumye kubona serivisi z’ubuvuzi, ibikoresho by’ubwubatsi birimo sima n’amabati, ndetse n’ibindi bikenerwa mu buzima bwa buri munsi, bikomeza kuba ikibazo gikomeye.
Avuga ko n’ibikorwa remezo bike byagezweho muri ako karere ahanini byubatswe ku mbaraga z’abana bahavuka, cyane cyane ab’i Mulenge, binyuze mu mishinga yabo bwite. Icyakora, byinshi muri byo byaje kwangizwa n’intambara zimaze igihe kirekire muri ako karere.
Intambara zatumye ibyagezweho bisubira inyuma
Mu butumwa bwe, Girinka Kabare William yibukije ko intambara zagiye zibasira Hauts-Plateaux kuva mu mwaka wa 1964, zigakomeza mu bihe bitandukanye kugeza ku ntambara yo kwirwanaho yatangiye mu 2017, ikaba ikomeje kugeza mu 2026.
Yagaragaje ko, mu gihe abaturage bagihanganye n’ingaruka z’izo ntambara, bidakwiye ko gahunda z’iterambere zishyirwa ku ruhande hagategerezwa ko intambara zirangira burundu.
Yagize ati: “Nyiri mupfu niwe ufata ahanuka!”
Avuga ko abaturage badakwiye gukomeza gutegereza ko ibibazo byose by’umutekano bikemuka kugira ngo batangire gutekereza ku iterambere ry’akarere kabo.
Yanagaragaje impungenge z’uko, mu isesengura rye, ikibazo cy’umuhanda n’ubwigunge bw’ako karere byagize uruhare mu gutuma abaturage benshi bahava. Yongeyeho ko intambara avuga ko zigamije kubirukana muri gakondo yabo zongereye uburemere bw’icyo kibazo. Yashinje Leta ya Congo gufatanya n’u Burundi mu mugambi wo kwirukana abaturage muri ako karere.
Umuhanda wa “Agaciro Kacu” nk’umushinga w’igihe kirekire
Mu cyifuzo yageneye MPA na Gakondo, Girinka Kabare William yasabye ko gahunda zisanzwe z’ubutabazi zongerwaho gahunda irambye yo gushaka inkunga no kubaka umuhanda wahuza Bukavu, Nyangezi, Kaziba, Rurambo na Hauts-Plateaux ukagera i Nganji.
Yavuze ko uwo muhanda ukwiye kwitwa “Agaciro Kacu”, kuko awufata nk’ikimenyetso cy’ubudaheranwa bw’abaturage n’icyemezo cyo kutemera ko intambara, gusenyerwa no guhezwa bibambura burundu gakondo yabo.
Yasobanuye ko uwo muhanda wagira uruhare mu koroshya ibikorwa by’ubutabazi, gutuma abatuye ako karere babona serivisi z’ibanze, koroshya ubwikorezi no gufasha impunzi zifuza gutahuka ziva mu bihugu zahungiyemo.
Yongeyeho ko umuhanda ari kimwe mu bikorwa remezo byafasha kuzamura imibereho y’abaturage no gushyiraho ibisabwa kugira ngo iterambere rirambye rishoboke, nubwo ibibazo by’umutekano byaba bitarakemutse burundu.
MPA na Gakondo basabwe kwagura ubuvugizi
Girinka Kabare William yashimye ibikorwa Mahoro Peace Association (MPA) na Gakondo byakoze mu myaka icyenda ishize, kuva mu 2017 kugeza mu 2026, mu gufasha abaturage bagizweho ingaruka n’intambara zo muri Hauts-Plateaux.
Yabasabye gukomeza izo nshingano, ariko bakongeraho imbaraga mu gushaka inkunga no gukora ubuvugizi ku rwego mpuzamahanga kugira ngo umushinga w’umuhanda wa “Agaciro Kacu” ushobore kugerwaho.
Yasabye kandi abaturage bakomoka muri ako karere baba muri Diaspora, abari mu bihugu bitandukanye bya Afurika n’abandi bafatanyabikorwa kugira uruhare mu gutanga umusanzu, buri wese hakurikijwe ubushobozi bwe.
Yagaragaje ko ku bufatanye bw’izo nzego n’abaturage, ndetse no ku bufatanye n’ubuyobozi bwa FRN, bishoboka ko uwo mushinga wagezweho.
Mu butumwa bwe, yagaragaje ko MPA na Gakondo atari amashyirahamwe asanzwe gusa, ahubwo abona ko ari ijwi n’amaso by’abaturage batabasha kwigeza ku nzego zifata ibyemezo.
Yagize ati: “Nimwe jisho ryacu, nimwe Imana yateguye muri iki gihe ngo muzabere Amaso ubwoko bwacu.”
Yakomeje ashimangira ko ayo mashyirahamwe yabaye n’amatwi yumva ibibazo by’abaturage, ndetse akaba n’ururimi rubavugira aho batari.
“Intambara ntizikwiye kutubuza gutekereza ku iterambere”
Mu gusoza ubutumwa bwe, Girinka Kabare William yasabye MPA na Gakondo gufata ikibazo cy’umuhanda nk’icyihutirwa kandi cy’ingenzi ku hazaza ha Hauts-Plateaux.
Yagaragaje ko abaturage badakwiye gukomeza kuba mu bwigunge kubera kubura ibikorwa remezo, kandi ko kubaka umuhanda byaba imwe mu nzira zo kongera ubushobozi bw’akarere mu bikorwa by’ubutabazi, ubukungu n’iterambere ry’imibereho myiza.
Yashimangiye ko icyizere cy’abaturage gishingiye ku bufatanye bw’inzego zitandukanye, agaragaza ko muri iki gihe bafite Imana, Mahoro Peace Association (MPA), Gakondo na FRN nk’inzego n’abafatanyabikorwa abona bashobora kugira uruhare mu guhindura imiterere y’akarere.
Yasoje asaba abo yageneye ubutumwa kwakira icyo cyifuzo bakakigira icyabo, bagatangiza ubuvugizi bushya bugamije gukura Hauts-Plateaux mu bwigunge.
Minembwe Capital News (MCN)