Gen. Ekenge Yashinje Gen. Kamanzi Gukorera Impande Zombi, Atanga Ubutumwa Bugamije Guteza Amacakubiri muri FRN
Minembwe Capital News (MCN)
Umuvugizi w’Igisirikare cya Repubulika Iharanira Demokarasi ya Congo (FARDC), Général-Major Sylvain Ekenge, yashinje Brigadier General François Kamanzi, uherutse kuva muri icyo gisirikare akiyunga ku ihuriro rya politiki n’igisirikare rya Front pour la Refondation de la Nation (FRN), kuba yarakoraga ubutasi ku mpande zombi. Ekenge yavuze ko Kamanzi yahaga FARDC amakuru y’ibanga yerekeye imitwe yitwaje intwaro, by’umwihariko umutwe wa M23.
Ibi Ekenge yabivugiye mu kiganiro yagiranye n’umuyoboro wa YouTube wa Wab-Infos TV, cyasohotse ku wa Kane, tariki ya 04/11/2026. Yavuze ko amakuru Kamanzi yahaga FARDC yafashije icyo gisirikare gukurikirana no kugaba ibitero ku basirikare bakuru ba M23, bamwe bakicwa, abandi bagafatwa.
Mu magambo ye, Ekenge yagize ati: “Twari tumuzi nk’umuntu wari mu gisirikare kandi wadufashije cyane mu makuru y’ubutasi. Yaduhaye amakuru menshi yerekeye inyeshyamba n’abasirikare benshi bakuru bazo. Barapfuye kubera ko yaduhaye ayo makuru menshi.”
Gen. Ekenge yavuze ko inzego z’ubutasi za FARDC zari zimaze igihe zikurikirana Kamanzi kubera umubano we n’uruhande rwa Joseph Kabila, ndetse n’isano y’umuryango afitanye na Gen. Sultani Makenga, Umugaba Mukuru w’Ingabo za ARC, ishami rya gisirikare rya FRN. Kamanzi ni muramu wa Makenga, kuko yashakanye na mushiki we.
Yasobanuye ko nubwo Kamanzi yakomeje guhabwa inshingano muri FARDC, inzego z’ubutasi zari zaramenye ko akomeza kugirana ibiganiro n’uruhande rwa Kabila. Ekenge yavuze ko ibyo byagaragajwe n’ibiganiro ngo byafashwe n’inzego z’ubutasi z’igisirikare.
Mu bindi birego, umuvugizi wa FARDC yavuze ko Joseph Kabila yaba yari yarasezeranyije Kamanzi ko azasimbura Makenga ku buyobozi bw’ibikorwa bya gisirikare bya M23. Iryo sezerano ngo ryari rishingiye ku bibazo by’ubuzima Makenga yaba afite, ndetse n’ibihano yafatiwe n’amahanga. Icyakora, amakuru ahari agaragaza ko Gen. Makenga nta kibazo cy’ubuzima afite. Ekenge yumvikanishije ko iryo sezerano rishobora kuba ryaragize uruhare mu cyemezo cya Kamanzi cyo kuva muri FARDC akagana muri FRN.
Ibi birego bya Ekenge byatanzwe mu gihe Kamanzi aherutse kwiyunga kuri FRN, ihuriro riyobowe na Joseph Kabila kandi rihanganye n’ubutegetsi bwa Perezida Félix Tshisekedi. Umuvugizi wa FRN, Lawrence Kanyuka, yemeje ko Kamanzi yinjiye muri iri huriro, avuga ko yafashe icyo cyemezo ashingiye ku byo yise ibitero byibasira abasivili.
Amagambo ya Ekenge ashobora guteza impaka no kutizerana hagati ya Kamanzi n’abandi bagize FRN, cyane cyane bitewe n’ibirego bimushinja kuba yarahaga FARDC amakuru y’ubutasi mu gihe yari agifite inshingano muri icyo gisirikare. Ibi kandi bishobora kumvikana nk’ubutumwa bugamije kuburira abandi basirikare bashobora gutekereza kuva muri FARDC bakiyunga kuri iri huriro.
Kwinjira kwa Kamanzi muri FRN ni impinduka ifite uburemere mu rwego rwa gisirikare, bitewe n’ubunararibonye n’inshingano zitandukanye yagiye agira muri FARDC. Icyakora, ibirego byose byatanzwe na Ekenge bikwiye gufatwa nk’ibyo umuvugizi w’igisirikare cya Leta ya Kinshasa yatangaje, kuko nta bimenyetso byigenga birambuye yashyize ahagaragara byemeza ibyo ashinja Kamanzi.
Minembwe Capital News (MCN)