Lubumbashi: Igitero ku Biro bya Guverineri Gisize Inzego z’Umutekano mu Rujijo, Abantu Babiri Barapfa
Minembwe Capital News (MCN)
Mu mujyi wa Lubumbashi, mu Ntara ya Haut-Katanga muri Repubulika Iharanira Demokarasi ya Congo (RDC), abantu bitwaje intwaro bo mu mutwe wa Maï-Maï bagabye igitero ku biro bya Guverineri w’iyo ntara, gihitana abantu babiri barimo umupolisi n’umwe mu bagabye igitero, mu gihe abandi benshi bakomeretse.
Amakuru yatangajwe n’igitangazamakuru Câble avuga ko muri icyo gitero abasirikare bane bakomeretse, umwe muri bo akaba yakomeretse bikomeye. Inzego z’umutekano kandi zataye muri yombi abantu benshi bakekwaho kugira uruhare muri icyo gitero.
Mu bahitanywe n’icyo gitero harimo umupolisi wari ushinzwe kurinda umutekano w’ibiro bya Guverineri ndetse n’umwe mu bagabye igitero. Abakomeretse barimo abo basirikare bane, umwe muri bo akaba arembye.
Kugeza ubu, Câble ntiratangaza impamvu nyakuri yaba yihishe inyuma y’icyo gitero. Nta makuru arambuye kandi iratangaza ku mubare nyawo w’abagabye igitero cyangwa ku cyerekezo cy’iperereza rikomeje.
Minembwe Capital News (MCN)