Perezida Tshisekedi na Ndayishimiye Bongeye Guhurira i Brazzaville Nyuma yo Guhurira i Moscow, Dore Icyabahuje

Minembwe Capital News (MCN)

Perezida wa Repubulika Iharanira Demokarasi ya Congo (RDC), Félix Tshisekedi, na mugenzi we w’u Burundi, Evariste Ndayishimiye, bongeye guhura mu nama mpuzamahanga yabereye i Brazzaville, muri Repubulika ya Congo, nyuma y’iminsi mike bahuriye i Moscow, mu nama yahuje u Burusiya n’ibihugu bya Afurika.

Aba bakuru b’ibihugu bahuriye mu muhango wo gutangiza gahunda y’Umuryango w’Abibumbye igamije guteza imbere gutera amashyamba no gusana ayangiritse, izwi nka « Décennie des Nations Unies pour le boisement et le reboisement ».

Uyu muhango wabaye ku wa Gatanu, tariki ya 06/11/2026, mu rwego rwo kwizihiza ku nshuro ya 40 Umunsi w’Igihugu w’Igiti muri Repubulika ya Congo.

Perezida Tshisekedi yitabiriye iki gikorwa ari kumwe na Perezida wa Repubulika ya Congo, Denis Sassou Nguesso, Perezida w’u Burundi, Evariste Ndayishimiye, na Perezida wa Repubulika ya Centrafrique, Faustin-Archange Touadéra.

Ibi birori byabereye ahitwa Maloukou, ku birometero 45 uvuye mu Mujyi wa Brazzaville. Byaranzwe n’umuhango wo gutera ibiti, hagamijwe kugaragaza akamaro ko kubungabunga amashyamba no gusana ayangiritse.

Mu kiganiro yagiranye n’itangazamakuru i Kintélé, Perezida Tshisekedi yagarutse ku kibazo cy’iyangirika ry’amashyamba muri RDC, agaragaza ko imwe mu mpamvu zikomeye zibitera ari ibikorwa by’ubuhinzi bikorerwa mu buryo bwo gutema ibiti no gutwika ibihuru kugira ngo haboneke ubutaka bwo guhingaho.

Mu bisubizo yatanze, yashimangiye ko hakenewe guteza imbere ubuhinzi burambye bukorerwa ahantu hamwe, ubuhinzi buvanze n’ibiti, kugeza amashanyarazi ku baturage kugira ngo hagabanuke ikoreshwa ry’inkwi n’amakara, ndetse no kongera ibikorwa byo gutera ibiti.

Ku ruhande rwe, Perezida Denis Sassou Nguesso yagaragaje ko iyi gahunda ifite akamaro karenze imbibi z’ibihugu, kuko igamije guhuza amahanga mu kurengera amashyamba no kubungabunga ibidukikije ku nyungu z’ibisekuruza bizaza.

Yavuze ko Brazzaville ari ho hatangiriye urugendo rushya rwo guhuza Isi mu bikorwa byo kurengera amashyamba, hagamijwe ko n’ibisekuru bizaza bizungukira ku bikorwa byo kubungabunga umutungo kamere.

Ihuriro rya Tshisekedi na Ndayishimiye i Brazzaville ribaye nyuma y’aho aba bayobozi baherukaga guhura i Moscow, mu Burusiya, mu nama yahuje u Burusiya na Afurika. Ni irindi huriro ryabo mu gihe ibihugu byombi bikomeje gukurikirana ibibazo by’umutekano n’imibanire mu karere k’Ibiyaga Bigari.

Minembwe Capital News (MCN)