Kalehe: Ijoro Rimwe Ryahinduye Isura y’Agace Kari Kamaze Iminsi Mu Maboko ya FARDC na Wazalendo
Minembwe Capital News (MCN)
Agace ka Katasomwa, gaherereye mu misozi miremire ya Mubugu, mu gace ka Mubuku-Bushaku, muri Chefferie ya Buhavu, Teritwari ya Kalehe, mu Ntara ya Kivu y’Amajyepfo, kamaze kwigarurirwa na Front pour la Refondation de la Nation (FRN), nyuma y’imirwano ikomeye yahabereye mu rukerera rwo kuri uyu wa Mbere, tariki ya 09/11/2026.
Amakuru aturuka mu masoko yo muri ako karere avuga ko abasirikare ba FRN batangiye guhangana n’ihuriro ry’ingabo za Repubulika Iharanira Demokarasi ya Congo (FARDC) n’abarwanyi ba Wazalendo muri Katasomwa kuva mu ijoro ryo ku Cyumweru rishyira ku wa Mbere, ahagana saa sita z’ijoro. Nyuma y’imirwano ikomeye, ngo bashoboye kwirukana muri ako gace ingabo za FARDC n’abarwanyi ba Wazalendo bari baherutse kukigarurira.
Iyi mirwano yabaye nyuma y’uko Katasomwa yari yabanje gufatwa n’ingabo za FARDC zifatanyije n’abarwanyi ba Wazalendo ku wa Gatandatu, tariki ya 07/11/2026, ahagana saa kumi n’ebyiri z’umugoroba, na bwo nyuma y’imirwano ikomeye.
Nyuma y’izo mpinduka zikurikirana mu kugenzura aka gace, FRN yongeye kukigarurira, isubirana igenzura ryuzuye rya Katasomwa.
Amakuru aturuka mu nzego z’ubuvuzi zo muri ako karere avuga ko nibura abantu 11 bakomeretse muri iyo mirwano. Ayo makuru avuga ko bakomeretswe n’amasasu yarashwe ku ruhande rw’abarwanyi ba Wazalendo n’ingabo za FARDC.
Iyo mirwano yanatumye abaturage benshi bava mu byabo bahunga umutekano muke. Mu duce twavuzwemo umubare munini w’abaturage bahunze harimo Bushaku, Nyawaronga, Kashie, Nkamboke na Katasomwa.
Ibi bibaye mu gihe umutekano ukomeje kuba muke mu bice bitandukanye bya Teritwari ya Kalehe, aho imirwano hagati ya FRN n’ingabo za FARDC zifatanyije n’abarwanyi ba Wazalendo ikomeje guteza impinduka mu kugenzura ibice bitandukanye. Muri iki gihe, FRN ikomeje kwigarurira uduce twari dusanzwe tugenzurwa n’ihuriro ry’ingabo ihanganye na ryo.
Minembwe Capital News (MCN)