Amerika Ifatiye Icyemezo Gishya Abagenzi Bavuye muri RDC: Harimo n’Abanyamerika!
Minembwe Capital News (MCN)
Leta Zunze Ubumwe za Amerika zashyizeho amabwiriza mashya agenga abagenzi berekeza muri icyo gihugu. Ayo mabwiriza ateganya ko abantu bose, barimo n’abaturage b’Abanyamerika, baba barasuye Repubulika Iharanira Demokarasi ya Congo (RDC) mu minsi 21 ibanziriza urugendo rwabo, batemerewe kwinjira mu ndege ziberekeza muri Amerika.
Nk’uko ayo mabwiriza abiteganya, umuntu wese wagiye muri RDC mu minsi 21 ibanziriza itariki ateganyijweho guhagurukira yerekeza muri Amerika, agomba kubanza gutegereza ko iminsi 21 yuzura uhereye igihe yaviriye ku butaka bwa Congo, kugira ngo yemererwe gufata indege imujyana muri Leta Zunze Ubumwe za Amerika.
Ikintu cy’ingenzi muri aya mabwiriza ni uko atareba abanyamahanga cyangwa abagenzi baturuka muri RDC gusa, ahubwo anareba abaturage ba Leta Zunze Ubumwe za Amerika baba barasuye icyo gihugu, hatitawe ku mpamvu yabajyanye yo.
Ikindi kandi, aya mabwiriza areba n’abagenzi baba baranyuze ku kibuga cy’indege cyo muri RDC mu gihe cy’urugendo rwabo, kabone nubwo baba batavuye mu ndege cyangwa ngo bagire ibindi bikorwa bakorera muri icyo gihugu. Mu yandi magambo, kuba indege yahagarara ku kibuga cy’indege cyo muri Congo, umugenzi akaguma mu ndege, na byo birahagije kugira ngo afatwe nk’uwanyuze muri icyo gihugu kandi agomba kubahiriza igihe cy’iminsi 21 yo gutegereza.
Ibi bivuze ko n’umuntu waba yarasuye RDC mu gihe gito, cyangwa akaba yarahanyuze gusa agamije guhindura indege, agomba kubanza gutegereza ko iminsi 21 yuzura uhereye igihe yaviriye muri icyo gihugu mbere yo gukomeza urugendo rwe rwerekeza muri Amerika.
Kubera iyo mpamvu, abateganya ingendo zijya muri Leta Zunze Ubumwe za Amerika, cyane cyane abaherutse gusura RDC cyangwa abateganya kuhanyura mu gihe cy’ingendo zabo, barasabwa kugenzura mbere ibisabwa no kubahiriza aya mabwiriza, kugira ngo birinde kugera ku kibuga cy’indege bakangirwa kwinjira mu ndege.
Aya makuru yatangajwe binyuze ku rubuga rwa X rwa Ambasade ya Leta Zunze Ubumwe za Amerika muri RDC.
Minembwe Capital News (MCN)