I Burundi: Abanyamulenge Bongeye Kwemererwa Gushinga Mutualité, Hashyirwaho Ubuyobozi Bushya

Minembwe Capital News (MCN)

Abanyamulenge batuye i Bujumbura mu Burundi bongeye kubona uburenganzira bwo gushinga ubuyobozi bwabo buzwi nka Mutualité, nyuma y’amezi menshi Leta y’u Burundi yari imaze yarabuhagaritse, ndetse igahagarika n’ubuyobozi bwari busanzweho.

Amakuru MCN yahawe n’amasoko ari mu Burundi agaragaza ko Abanyamulenge bamaze gushyiraho ubuyobozi bushya bwa Mutualité. Muri izo mpinduka, Muzuri yagizwe Perezida, naho Rugabire agirwa Visi-Perezida.

Iyi ntambwe ije nyuma y’igihe ubuyobozi bwa Mutualité y’Abanyamulenge bwari bwarahagaritswe na Leta y’u Burundi, inzego zayo na zo zigaseswa. Kuba bongeye kwemererwa gushyiraho ubuyobozi bwabo bifatwa nk’impinduka zifite akamaro mu mibereho n’imikoranire y’abagize uyu muryango baba muri icyo gihugu.

Mutualité ni urwego rukomeye mu guhuza Abanyamulenge, kubafasha gukemura ibibazo bahura na byo no gukurikirana imibereho y’abanyamuryango. Runa rufasha mu kumenya no gukurikirana ibibazo by’abafunzwe, abahuye n’ibyago, imiryango ifite ibibazo ndetse n’abandi banyamuryango bakeneye ubufasha.

Andi makuru MCN ifite avuga ko Munigantama Seba Kiyana, uri i Kinshasa muri Repubulika Iharanira Demokarasi ya Congo (RDC), yagize uruhare mu bikorwa byafashije kugira ngo iyi Mutualité yongere kwemerwa na Leta y’u Burundi. Ibi ni ibyatangajwe na bamwe mu bari muri icyo gihugu baganiriye n’amasoko ya MCN.

Kongera kwemererwa gushinga uru rwego bishobora gufungura inzira nshya ku Banyamulenge batuye mu Burundi, bakabona urwego rubahuriza hamwe, rukabafasha kugeza ibibazo byabo ku nzego zibishinzwe no gukurikirana inyungu zabo nk’umuryango.

By’umwihariko, biteganyijwe ko Mutualité izagira uruhare mu gukurikirana ibibazo by’Abanyamulenge bafungiye mu Burundi, aho amakuru MCN ifite agaragaza ko hari benshi bafunzwe. Icyakora, ibirego n’impamvu z’ifungwa ryabo bigomba gukurikiranwa kuri buri muntu ku giti cye, kugira ngo hamenyekane neza imiterere y’ibirego aregwa n’uko dosiye z’imanza zabo zihagaze.

Kuri benshi mu Banyamulenge baba mu Burundi, kongera kubona uburenganzira bwo gushyiraho Mutualité ni intambwe ifite agaciro gakomeye, cyane cyane mu gihe hakenewe urwego rubahagararira, rukabahuza kandi rugakurikirana ibibazo bahura na byo.

Minembwe Capital News (MCN)