Rugezi Yagabweho Ibitero Bikomeye: Col. Rugabo Fidel Agira Ibyo Atangaza!
Minembwe Capital News (MCN)
Col. Rugabo Fidel, wo mu mutwe wa politiki n’igisirikare wa Front pour la Refondation de la Nation (FRN), yatangaje ko ingabo za Repubulika Iharanira Demokarasi ya Congo (FARDC), zifatanyije n’ingabo z’u Burundi, imitwe ya Wazalendo na FDLR, ndetse n’abacanshuro baturutse i Burayi no muri Aziya, zagabye ibitero mu bice byo mu Rugezi, mu majyepfo ya Centre ya Minembwe, mu misozi miremire y’i Mulenge, mu Ntara ya Kivu y’Amajyepfo, mu Burasirazuba bwa Repubulika Iharanira Demokarasi ya Congo.
Mu butumwa yatanze kuri uyu wa Gatatu, tariki ya 18/11/2026, Col. Rugabo Fidel yamenyesheje abaturage n’abandi bakurikiranira hafi ibibera muri ako karere ko ibyo bitero byibasiye abaturage bo mu bice byo mu Rugezi.
Amakuru yatangajwe na Col. Rugabo Fidel agaragaza ko ibitero byagabwe byaturutse mu cyerekezo cya Kabanju na Gasiro, bikibasira uduce two mu Rugezi, duherereye mu majyepfo ya Centre ya Minembwe.
Kabanju ni agace gafite akamaro gakomeye mu bikorwa bya gisirikare, kuko karimo ibirindiro bikomeye by’ingabo za Repubulika Iharanira Demokarasi ya Congo. Ni na hamwe mu hantu indege zitagira abapilote (drones) zifashishwa mu kugaba ibitero mu bice bitandukanye, birimo n’ahatuwe n’abaturage benshi bo mu Minembwe no mu nkengero zayo.
Mu butumwa bwe, Col. Rugabo Fidel yavuze ko ingabo za FRN ziri mu bikorwa bya gisirikare bigamije kurinda abaturage no gusubiza inyuma abagabye ibyo bitero.
Yagize ati: “Ingabo zacu zirimo gukora ibikorwa byo kurinda abaturage no gusubiza inyuma ababagabyeho ibitero.”
FRN yamaganye ibyo bitero, ibifata nk’ibikorwa byibasira abaturage b’inzirakarengane, ishimangira ko bidakwiye kwibasira abaturage badafite uruhare mu mirwano.
FRN ivuga ko ikomeje kurinda abaturage
Mu gihe ibitero bivugwa mu Rugezi bikomeje gukurikiranwa, FRN yatangaje ko ingabo zayo zikomeje ibikorwa byo kurengera abaturage, kubarwanaho no guhangana n’abagabye ibyo bitero, hagamijwe kubasubiza inyuma.
Minembwe Capital News (MCN)
